Аралас жекпе-жек шебері Жалғас Жұмағұлов әлемдегі ең танымал ұйым – UFC аясында өзінің алғашқы айқасын өткізіп, төрешілердің шешімі бойынша қарсыласына есе жіберді. Алайда, тәуелсіз сарапшылар төрешілік әділ болмағанын айтуда.
Әбу-Дәби қаласындағы “Жауынгерлер аралында” өткен UFC 251 турнирінде қандасымыз 24 жастағы бразилиялық Раулиан Пайвамен жұдырықтасып, үш раундқа созылған жекпе-жекте төрешілер шешімі бойынша (29-28, 29-28, 29-28) жеңіліп қалды. Нәтижеге қарап кездесу отандасымыз үшін ауыр өтті деп айта алмаймыз. Бірінші раундта Раулиан айқас тізгінін қолына алып, аздаған басымдыққа ие болды. Десе де, екінші раундты қандасымыз ширақ бастады. Алғашқы және соңғы минуттарда Жалғас қарсыласын ауыр соққының астына алды. Үшінші бес минутта да жерлесіміз жаман өнер көрсеткен жоқ еді. Соққыларды да қарсыласына қарағанда көбірек жұмсаған.
Жалпы, бразилиялықты жоғары деңгейдегі мықты спортшы деп айта алмаймыз. Өйткені, аталған ұйымда үш айқас өткізген Пайва бір рет жеңіске жетіп, екеуінде жеңілістің кермек дәмін татқан.
Сурет: https://www.sports.kz/