Петропавл қаласында жаға ұстатар жағдай орын алғаны жайлы әлеуметтік желі қолданушылары жарыса жазды. Айтуларынша, педофил 10 жасар ер баланы зорлап кеткен. Бұл ақпарат ұстаздардың құлағына жетіп, олар ата-аналарға балаларын мектепке жалғыз жібермеуді ескертіп үлгерген. Артынша бұл оқиғаға байланысты облыстық ішкі істер департаментінің баспасөз қызметі де ресми мәлімет таратты.
– Петропавл қаласында кәмелеттік жасқа толмаған баланы зорлады деген күдікпен 44 жастағы азамат ұсталды. Ол уақытша ұстау абақтысына қамауға алынды. Сотқа дейінгі тергеу амалдары басталды, – деді департаменттің баспасөз қызметінің жетекшісі Мәдина Балғашоқова.
Полиция тергеу амалдары әлі жүріп жатқандықтан басқа мәлімет беруден бас тартып отыр. Сот-медициналық сараптама нәтижесі де әлі шыға қоймаған көрінеді.
(Өз тілшіміз).