Қазақстан Республикасы Президенті жанындағы Орталық коммуникациялар қызметінің өңіріміздегі филиалында өткен баспасөз маслихатында Мемлекеттік қызмет істері және сыбайлас жемқорлыққа қарсы іс-қимыл агенттігінің облысымыздағы аумақтық бөлімшелерінің бірінші тоқсанда атқарған жұмысы қорытындыланды.
Өткен үш айда сыбайлас жемқорлыққа қарсы іс-қимыл ұлттық бюросының облыстық департаментінің мамандары 64 қылмысты тіркеген. Бұл өткен жылдың сәйкес мерзімімен салыстырғанда 2,5 есеге көп. Орын алған құқық бұзушылықтардың 83 пайызы – сыбайлас жемқорлық фактілері. Әсіресе, пара беру және алу, қаржыны жымқырғандар көш бастап тұр. Ал ауыр қылмыстардың саны 60 пайызға артыпты.
– Бірінші тоқсанда департаменттің өндірісінде сыбайлас жемқорлыққа қатысты 100 іс болды. Бұл да өткен жылдың көрсеткішінен екі есе көп. Оның 74-і бойынша тергеу жұмыстары аяқталып, 47-сі сотқа жіберілді. 3 айдың қорытындысы бойынша “бармақ басты, көз қыстылыққа” қатысы барлардың саны соңғы үш жылдың тоқсандық көрсеткішінен асып кетті, – деді Сыбайлас жемқорлыққа қарсы іс-қимыл ұлттық бюросы облыстық департаментінің басшысы Асхат Жұмағали.
Баспасөз мәслихатында мемлекеттік қызметшілер арасында сыбайлас жемқорлықтың алдын алу шарасы да сөз болды.
– Жыл басынан бері қоғамдық сананы қалыптастыру үшін “Қызылжар – адалдық алаңы” жобасы жүзеге асырылуда. Жобалық кеңсенің мақсаты – тұрмыстық жемқорлықты жою, қоғамдық бақылауды жүзеге асыру және жемқорлыққа қарсы мәдениетті қалыптастыру, – деген Мемлекеттік қызмет істері және сыбайлас жемқорлыққа қарсы іс-қимыл агенттігі облыстық департаментінің басшысы Елена Степаненко бұл саладағы кадр тұрақсыздығы саябырлағанын тілге тиек етті.
Мемлекеттік қызметшілердің жұмыс уақытынан тыс еңбек етуі азайған. Ол үшін мемлекеттік органдарда жұмыс компьютерін бір мезетте сөндіретін автоматты жүйе іске қосылыпты. Десе де, мемлекеттік қызметшілердің еңбек және басқа да құқықтарының бұзылуына жол берген алты мемлекеттік органның басшыларына әкімшілік шара қолданылған. Ал жұмыстан бос уақытта еңбек еткені үшін мамандарға қосымша ақы төленіп, демалыс берілген.
Департамент мамандары мемлекеттік қызметшілердің Әдеп кодексінің сақталуына байланысты мемлекеттік органдарда 8 тексеріс өткізіп, 62 заң бұзушылықты анықтаған. Мәселен, облыстық орман шаруашылығы және жануарлар дүниесі аумақтық инспекциясын тексеру барысында бөлім басшысына тәртіптік жазаны қолдану реті бұзылғаны белгілі болған. Тәртіптік жауапкершілікті қолданбас бұрын алдымен қызметтік тексеріс жүргізілуі керек еді. Мемлекеттік қызметшінің құқығы қорғалып, заңсыз қолданылған тәртіптік жаза алынып тасталды.
Арайлым БЕЙСЕНБАЕВА, “Soltústik Qazaqstan”.