ЖЕҢІЛ ӨНЕРКӘСІП: ІЗДЕНІСТЕР МЕН ІРКІЛІСТЕР

Президент Қасым-Жомарт Тоқаев “Сындарлы қоғамдық диалог – Қазақстанның тұрақтылығы мен өркендеуінің не­гізі” Жолдауында өз өнімін экспортқа шығаратын компанияларға мемлекеттік қолдау көрсетудің тиімділігін барынша арт­тыру қажеттігін атап көрсетіп, Үкіметке мемлекеттік индустриалық-инновациялық даму бағдарламасы шең­бе­рінде кешенді шаралар әзірлеуді, оның ішінде салықтық, қаржылық, әкімшілік ынталандыруды, шетелден тікелей ин­вес­тиция тарту жұмыстарын барынша жандандыруды тапсырды. Осы­ған орай Қазақстанның 2025 жылға дейінгі стра­тегиялық даму жоспары аясында әрбір сала мен өңір үшін нақты мақ­сатты көрсеткіштер белгіленді. Бұл та­лап­тардың халық­тың өмір сүру сапасын жақсартуға айтарлықтай ықпал ете­тін түрлі өндіріс салаларымен қатар жеңіл өнеркәсіпке де ті­келей қатысы бар. Бүгінгі таңда бәсекеге қабілетті отан­дық өнімдер шығарып, нарық көк­жиегін кеңейтуге басым бағыт беріліп отырған аса жауапты кезеңде жеңіл өнер­кәсіптің орны бөлек. Оның үстіне өр­ке­ниетті ел­дерде бұл сала тауарларына сұраныс азық-түлік өнімдерінен кейін екінші орында тұрғанын ескерсек, мән-маңызы тіпті арта түседі. Жеңіл өнеркәсіптің үлесі АҚШ, Италия, Германия, Қы­тай, Түркия секілді  мемлекеттерде 15-22 пайызды құраса, өкі­нішке қарай, Қазақстанда 1,2-1,5 пайызға ғана жетеғабыл. Қол­дағы мәліметтерге сүйенсек, өңірдегі ахуал да көңіл көн­шітпейді. Олай болса, жеңіл өнеркәсіптің жүгі неге “ауыр­лап” кеткенін саралап көрейік.