Жол қауіпсіздігі ережелерін сақтамайтындар қоғамдық көлік жүргізушілері арасында да аз емес. Мәселен, тек өткен жылы ғана автобус жүргізушілеріне жол жүру ережесін бұзғаны үшін 1000-нан аса хаттама толтырылған. Ал жыл басынан бері қоғамдық көлік жүргізушілерінің жол жүру ережесін бұзуының 410-нан астам фактісі анықталды. Оның 123-і көлік басқарып келе жатып ұялы телефонды пайдаланған, 32-сі жылдамдықты арттырған, 62-сі маневр ережесін бұзған, 46-сы көлікті тиісті құжаттарсыз басқарған, екеуі мас күйде рульге отырған.
– Соңғы екі жағдайда сот оларды ұзақ мерзімге жүргізуші куәлігінен айыру шешімін шығарды. Есіл аудандық сотының шешімімен 43 жастағы автобус жүргізушісі техникалық құралдарды басқару құқығынан 3 жылға дейін шеттетілді, – деді әкімшілік полициясы басқармасы бастығының орынбасары Вадим Яценко.
Мәдина БАЛҒАШОҚОВА,
облыстық ІІД-нің баспасөз хатшысы.