Оқушылардың жұмысшы мамандықтарға қызығушылығын ояту үшін М.Қозыбаев атындағы СҚМУ-да «Шеберлер қаласы» атты шара өтті. Оған Петропавл кұрылыс-экономикалық коледжінің оқытушылары мен студенттері және “Chaplin” барбершоп мамандары шақыртылды.
– Шараның басты мақсаты – жұмысшы мамандықтарға назар аудару. Сондықтан мұнда бірқатар шеберлерді шақырдық. Олар өз кәсібін жастарға жаңа қырынан таныстырып, болашақ мамандығын таңдауға ықпал етеді деген ойдамыз, – дейді “Шеберлер қаласы” шарасын ұйымдастырушы Даяна Оспанова.
Петропавл құрылыс-экономикалық колледжінің оқытушылары мен студенттері біліктіліктері мен өнерлерін көрсете білді. Болашақ аспаздар қамырдан қуыршақ, гүл, мысықтың, мүсінін әзірлесе, “құрылысшы” мамандығында оқып жүргендер әп-сәтте орындықтар жасап, сылақ жұмыстарын көрсетті. Қызу жұмысқа алғашында тосырқай қараған оқушылар, өздерінің қалай іске кірісіп кеткенін аңғармай қалды. Ал шараға арнайы шақыртылған “Chaplin” барбершоп мамандары шаш қиюдың әдіс-тәсілдерін үйретті.