Кеше Петропавл қаласында офтальмологиялық диагностикалық орталық ашылып, өңір басшысы Құмар Ақсақалов жаңа медициналық кешеннің жұмысымен танысты.
– Басты мақсат – сапалы әрі қолжетімді медициналық көмек көрсету. Енді тұрғындар басқа жаққа бармай-ақ, өзіміздің өңірде көзге ота жасау мүмкіндігіне ие болып отыр. Тегін медициналық көмектің кепілдік берілген көлемі есебінен емдеу орталығында бірқатар ота тегін жасалатын болады. Биыл қажетті құрал-жабдықтар сатып алу үшін қаржы былтырғыға қарағанда үш есе көп бөлініп отыр. Алдағы уақытта жаңа томографтар сатып алу жоспарлануда, – деген өңір басшысы Құмар Ақсақалов медицина саласын дамытудағы ілкімді істерге тоқталып, үстіміздегі жылдың қаңтар айынан бастап учаскелік дәрігерлердің жалақысы 20 пайызға көбейгенін тілге тиек етті. Облыс әкімі мемлекеттік-жекешелік әріптестік аясында салынған орталықты аралап, заманауи құралдармен жабдықталған кабинеттерде болды. Сондай-ақ, ем қабылдап жатқан науқастармен кездесіп, медицина қызметкерлерінің жұмысына сәттілік тіледі.
Кездесуде облыстық денсаулық сақтау басқармасының басшысы Тимур Сұлтанғазиев инвестициялық жобаның жалпы құны 550,4 миллион теңгені құрағанын, көз аурулары бойынша өңірде шамамен 7 мыңға жуық адам диспансерлік есепте тұрғанын жеткізді. Олардың екі жарым мыңнан астамы жеткіншек.
Жаңа офтальмологиялық кешенде консультативтік-диагностикалық, стационарлық көмек тегін және ақылы түрде көрсетілетін болады. Мұндай орталықтың іске қосылуы өңірдегі емдеу мекемелерінің жүктемесін азайтуға мүмкіндік беретіндігін айтқан жөн.
Ақмарал ЕСДӘУЛЕТОВА, “Солтүстік Қазақстан”.
Суретті түсірген Талғат ТӘНІБАЕВ.