Орталық коммуникациялар қызметінің өңірлік филиалында “Әлеуметтік қамтамасыз етудің тиімді жүйесі” тақырыбында өткен баспасөз мәслихатында облыс әкімінің орынбасары Асқар Сақыпкереев ел Президенті Қасым-Жомарт Тоқаевтың “Сындарлы қоғамдық диалог – Қазақстанның тұрақтылығы мен өркендеуінің негізі” Жолдауының және сайлауалды бағдарламасының өңірімізде жүзеге асырылу барысы туралы баяндады. Баспасөз мәслихаты барысында Асқар Жоламанұлы биыл өңірімізде аз қамтылған және көпбалалы отбасыларды қолдауға қомақты қаржы бөлінгеніне баса назар аударды.
жағдайын жақсарту және әділ әлеуметтік саясат құру мақсатында қыруар жұмыс атқарылуда. Атап айтқанда, биылғы жылдың сәуірінде атаулы әлеуметтік көмек беру тәртібі өзгергелі, мұндай көмекті алып келгендер саны 13 есеге артып, 27 мыңға жеткен. Бұл мақсатқа облыстық бюджеттен 2,5 млрд., республикалық бюджеттен 2,2 млрд. теңге жұмсалған. Көпбалалы отбасылардың әр сәбиіне келесі жылдан бастап республикалық бюджеттен 10-11 мың теңге көлемінде мемлекеттік жәрдемақы төленбек. Оны тағайындауда отбасының табысы есепке алынбайтынын айта кету керек. Аз қамтылған отбасылардың балалары мектепте ыстық тамақпен, жолақымен, мектеп киімімен және оқу құралдарымен қамтамасыз етілмек.
– Алайда, өз табысын жасырып, атаулы әлеуметтік көмекті заңсыз алғандар да жоқ емес. Ондай отбасылардың саны 1152 болып шықты. 705-іне көмек көрсетуден бас тартылды. 167 отбасы 14,7 млн. теңге көлеміндегі қаржыны бюджетке қайтарды. 20 іс сотта қаралуда, – деді Асқар Сақыпкереев.
Тұрғындарды масылдық пиғылдан арылту мақсатында бірнеше бағытта жұмыс жүргізілуде. Мәселен, отбасының еңбекке жарамды мүшесі өзіне ұсынылған жұмыстан бас тартса, сол отбасының барлық мүшелері атаулы әлеуметтік көмектен қағылады. Бұған дейін жұмыс істеуден бас тартқан адамның өзі ғана мұндай көмектен айырылатын.
2017 жылдан бастап тұрғындарды жұмыспен қамту “Еңбек” мемлекеттік бағдарламасы бойынша жүзеге асырылуда. Биыл біздің өңірімізде бұл бағдарламамен 24 мың адам қамтылып, 9,9 млрд. теңге игерілді.
Әкімнің орынбасарының айтуынша, 1635 адам еңбек нарығында сұранысқа ие мамандықтар бойынша білім алып, 465-і жұмысқа орналасты. Жыл соңына дейін қалғандары да жұмыс орнымен қамтылмақ.
“Еңбек” бағдарламасының тағы бір бағыты – тұрғындарға өз ісін ашу үшін жеңілдетілген несие беру. Биыл бұл мақсатқа бөлінген қаржы сомасы былтырғыдан 2,5 есе көп. 5,3 млрд. теңгеге жұмыссыз жүрген 637 адам өз ісін ашса, 384-і кәсібін кеңейтуге мүмкіндік алды. Оның үстіне несие алғандар 468 қосымша жұмыс орнын ашқанын айта кету керек. Кәсіп бастағысы келетіндер үшін облыстық кәсіпкерлер палатасында “Бастау Бизнес”, “Жас кәсіпкер” жобалары жүзеге асырылуда. Түлектер үшін 100 және 200 айлық есептік көрсеткіш көлемінде қайтарымсыз гранттар қарастырылған. Оның игілігін биыл 1875 адам көріп, мал, құс, өсімдік шаруашылығы, халыққа қызмет көрсету саласында өз ісін дөңгелетіп әкету мүмкіндігіне ие болды.
– Сонымен қатар 3292 адам қоғамдық жұмысқа тартылып, 774-і әлеуметтік жұмыс орындарымен қамтылды. 606 адам жастар тәжірибесі бойынша жарты жыл бойы еңбек етіп, айына 63 мың теңге айлық алғаны – олар үшін зор қолдау. Бүгінгі күні 1500 адам тұрақты жұмыс орнына орналастырылды. Қолданылған шаралардың нәтижесінде 2019 жылдың үшінші тоқсанында жұмыссыздық 4,8 пайызды, жастар арасындағы жұмыссыздық 2,7 пайызды, табысы күнкөрістің ең аз мөлшерінен төмен тұрғындардың үлес салмағы 5,1 пайызды құрады, – деді Асқар Жоламанұлы.
Баспасөз мәслихаты барысында оңтүстік өңірлерден солтүстікке көшіп келушілердің жайына тоқталған облыс әкімінің орынбасары биыл елордадан 100-ден астам отбасы көшіп келгенін, келесі жылы өңіріміз 3000-ға жуық адамды қабылдауға дайын екенін айтты. Өңір тұрғындарының 103 мыңнан астамы – зейнеткер. Сондықтан облысқа жұмыс күші қажет екеніне тоқталған Асқар Сақыпкереев бұл бағыттағы істер келесі жылы да жалғасын табатынын жеткізді.
Зейнеткерлер, мүгедектер мен ардагерлер де назардан тыс қалып жатқан жоқ. Жеңістің 75 жылдығына орай Ұлы Отан соғысы ардагерлеріне төленетін бірреттік төлемақы көлемі 252,5 мың теңгеден 300 мың теңгеге дейін, соғыс ардагерлеріне теңестірілген тұлғалардікі 12,6 мың теңгеден 100 мың теңгеге дейін ұлғайтылған. Облыс аумағында бүгінде 68 соғыс ардагері тұрып жатыр, соғыс ардагерлеріне теңестірілген 603 адам бар. Жеңістің 75 жылдығына дайындық жұмыстары басталып кеткенін айтқан Асқар Жоламанұлы бірқатар қайырымдылық шаралары қарастырылғанын тілге тиек етті. Ардагерлер Мәскеу және Нұр-Сұлтан қалаларында өтетін парадтарға қатысатын болады.
Баспасөз мәслихатының соңында өңірдегі бұқаралық ақпарат құралдарының өкілдері облыс әкімінің орынбасарына өз сұрақтарын қойды.
Роза ШӘКЕНОВА,
“Soltústik Qazaqstan”.