Еңбек, әлеуметтік қорғау және көші-қон комитетінің Солтүстік Қазақстан облысы бойынша департаменті мүмкіндігі шектеулі азаматтардың кедергісіз жүріп-тұруын қамтамасыз ету мақсатында 56 нысанға тексеріс жүргізіп, заң талаптарын орындамағандарға қатысты ұйғарым шығарды. Департамент қызметкерлерінің жүргізген жұмыстары негізінде кемшіліктердің 50 пайызы түзетілді. Яғни, қоғамдық орындар мен ғимараттарда мүмкіндігі шектеулі жандар үшін пандустар орнатылып, олар арнайы құрал-жабдықтармен қамтамасыз етілді. Сондай-ақ, тексеріс қорытындысы бойынша мұндай азаматтардың кедергісіз жүріп-тұруына қолайлы жағдай жасамағаны үшін 8 кәсіпорын басшысының үстінен әкімшілік құқық бұзушылық туралы іс қозғалып, олар жалпы сомасы 1 439 250 теңгенің айыппұлын төлейтін болды.
“Мүгедектерді әлеуметтік қорғау туралы” заңның 14 бабына сәйкес мүмкіндігі шектеулі азаматтар үшін әлеуметтiк инфрақұрылым нысандары кiрiп-шығуға ыңғайлы болуы тиіс. Яғни, кәсiпкерлiк қызметтi жүзеге асыратын жеке және заңды тұлғалар көлiк құралдарына, тұрғын үйлерге, қоғамдық және өндірістiк үйлерге, үй-жайларға және тағы басқа ғимараттарға арнайы құралдар орнату арқылы өздігінен жүріп-тұра алмайтын жандарға толыққанды жағдай жасауға мiндеттi. Мұндай жағдай жасамаған лауазымды тұлғалар – 50, шағын кәсіпкерлік субъектілері – 120, орта кәсіп – 200 және ірі кәсіпкерлік ұйымдары 400 айлық есептік көрсеткіш мөлшерінде айыппұл төлеуге міндеттеледі.
Қазіргі таңда мемлекет тарапынан мүмкіндігі шектеулі жандардың мәселелеріне ерекше көңіл бөлінуде. Мәселен, осындай тұлғалардың құқықтары арнайы қабылданған конвенцияда толықтай көрсетілген. Мүмкіндігі шектеулі азаматтар өзгелермен тең дәрежеде қоғамдық ұйымдардың қызметін еркін пайдаланып, ақпараттық-коммуникациялық технологиялар мен жүйелерді қоса алғанда ақпарат пен байланысқа, өзге де күнделікті өмірдегі қажеттіліктерге еш кедергісіз қол жеткізе алуы керек.
Гаухар ГАБДУЛЛИНА,
Еңбек, әлеуметтік қорғау және
көші-қон комитеті облыстық департаментінің бөлім басшысы.