Өңір басшысы Ғауез Нұрмұхамбетовтің төрағалығымен өткен облыстық әкімдіктің кеңейтілген отырысында Президент Қасым-Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты халыққа арнаған Жолдауынан туындайтын келелі міндеттер талқыланып, айқын мақсаттар белгіленді. Алқалы жиынға департамент, басқарма басшылары, мәслихат депутаттары, қоғамдық ұйым жетекшілері қатысты.
Жиынды кіріспе сөзбен ашқан Ғауез Торсанұлы Жолдауда айтылған барлық міндетті салмақты көзқараспен, мұқият, жан-жақты ойластырып, сапалы түрде жүзеге асыру талабы қойылып отырғанын, бұл орайда қоғамды жаңғыртуда жаппай цифрландыру және жасанды интеллект технологиясын барынша енгізу арқылы экономиканы түбегейлі өзгерту маңызды стратегиялық қағидат саналатынын атап өтті.
«Барлық саланы жаңғырту үшін жаппай жасанды интеллект енгізу жаңашылдығын қолдана отырып қана Қазақстанды бәсекеге қабілетті ел ретінде дамыта аламыз. Жауапты ведомство өкілдері қомақты инвестиция тарту, өңдеу өнеркәсібіне соны серпін беру, ауыл шаруашылығын жаңа деңгейге көтеру, тұрғын үй-коммуналдық шаруашылығы мен су инфрақұрылымын жетілдіру мәселелерімен бүгіннен бастап жүйелі айналысуы керек», – дей келе облыс әкімі тұрғындардың әл-ауқатын жақсарту, экономиканы еселей түсу жолында қолдағы мүмкіндіктер мен резервтерді толыққанды пайдалану қажеттігін атап өтті.
Мінбеге бірінші болып көтерілген облыстық мәслихаттың хатшысы Владимир Бубенко жасанды интеллектінің игіліктерін пайдаланудың артықшылықтарын сөз етті. Облыс әкімінің орынбасары Қанат Дүзелбаев Жолдаудың негізгі бағыттары мықты, орнықты, әртараптандырылған экономиканы қалыптастыруға, импортқа тәуелділікті төмендетуге, өңдеу өнеркәсібін, ауыл шаруашылығын цифрландыруға, инфляцияға қарсы күреске, кәсіпкерлікті дамытуға бағытталғанын жеткізді. Жыл басынан бері өңір экономикасы 12,8 пайызға өскен, бұл – еліміз бойынша ең жоғары көрсеткіштердің бірі. 10 мың жаңа жұмыс орны құрылып, жұмыссыздық деңгейі 4,4 пайызға дейін төмендеген. Жеке кірістер мөлшері 103,1 пайызды, яғни 99 млрд. теңгені құраған. Ішкі және сыртқы нарықта бәсекеге қабілетті, терең өңделген өнім шығаруға басымдық беру мақсатымен жалпыұлттық инвестициялық пулға 51 озық жоба енгізіліпті. Олардың жалпы құны 894 млрд. теңгені құрайды. Макроэкономикалық құрсаудан шығудың бір жолы өңдеу өнеркәсібінің дамуына қолайлы жағдай туғызу, әлеуетін тиімді пайдалана білу. Өңір өнеркәсібінде оның үлесі – 85,2 пайыз. 7 айда бұл салада 395,9 млрд. теңгенің бұйымдары мен тауарлары шығарылды. Өнеркәсіптік және аграрлық кластерлер құруға басымдық беріліп отыр. Бұл шаралар жыл аяғына дейін экономиканың өсімін 6,5 пайызға қамтамасыз етпек. 2028 жылы 7,2 пайызға дейін өсіру белгіленген.
«Президенттің футболды коммерцияландыру ісін жалғастыра беру керек деген талабының өңірге де тікелей қатысы бар. 2028 жылы «Қызылжар» футбол клубы толықтай жеке кәсіпкердің меншігіне өтеді. Үнемделген қаражат балалар футболын дамытуға жұмсалады», – деді баяндамашы.
Облыстық цифрлық технологиялар басқармасының басшысы Азамат Байтеміров жасанды интеллектіні жаппай енгізу және цифрландыру Президент белгілеп берген стратегиялық бағдарымыздың ең басты қыры екенін, осыған орай «Digital Qazaqstan» атты біртұтас тұжырымдамалық құжат әзірленетінін, бастамалар мен жобалардың бәрі жалпыұлттық стратегия аясына біріктірілетінін алға тартса, ауыл шаруашылығы және жер қатынастары басқармасының басшысы Дәурен Тоқужинов соңғы екі жылда 28 кәсіпорын 4 бағыт бойынша қаржыландырылып, 89 млрд. теңге инвестиция құйылғанын, нәтижесінде 1150 адам тұрақты жұмысқа орныққанын жеткізді. 2025-2027 жылдарға арналған «Жол картасы» шеңберінде 112 млрд. теңгенің 60 жобасы қолға алынған.
Облыстық кәсіпкерлік және индустриалды-инновациялық даму, энергетика және тұрғын үй-коммуналдық шаруашылығы, жолаушылар көлігі және автомобиль жолдары, жұмыспен қамту және әлеуметтік бағдарламалар, білім басқармаларының басшылары Дархан Әмрин, Данияр Қуанышбаев, Ерден Шортыбаев, Ринат Елжасов, Айнагүл Сұрағанова, М. Қозыбаев атындағы СҚУ-дың ректоры Ербол Исақаев алда атқарылатын жұмыс жоспарларымен бөлісті.
Облыстық әкімдіктің кеңейтілген отырысын қорытындылаған Ғауез Нұрмұхамбетов әділетті әрі қуатты Қазақстанды құру жолындағы маңызды қадамдарды белгілеп берген Жолдау талаптарын мүлтіксіз орындау барша солтүстікқазақстандықтардың борышы екенін қадап айтты.
Өмір ЕСҚАЛИ,
«Soltüstık Qazaqstan».