Сәбит Мұқанов атындағы облыстық қазақ сазды-драма театрында кішкентай көрермендерге арналған ертегі сахналанды. Өнегелі тәрбиені, шыншылдықты, достықты дәріптеген «Тентек теке» ертегісінің режиссері – Асылхан Разиев.
– Белгілі драматург Ерсайын Төлеубай ағамыздың «Тентек теке» қойылымы арқылы бүлдіршіндерді жақсылыққа шақырғымыз келді. Олар қойылымды тамашалағаннан кейін жаман мен жақсыны ажырата алатын болады, – деді театрдың көркемдік жетекшісі Дәурен Тойбазаров.
Ертегіде бес кейіпкер бар: әже, саудагер, теке, мысық пен күшік. Саудагер көзі көрмейтін, құлағы естімейтін аңқау әжеге тентек текені сатып, пайда тапқысы келеді. Теке болса тентектігін көрсетіп, үйдегі күшік пен мысыққа озбырлық жасап, оларды жаман әдеттерге үйрете бастайды. Әже ауруханада көз жанары мен есту қабілетін қалпына келтіріп, үйіне келсе, пәтері адам танымастай шашылып жатады. Тентек теке мысық пен күшікке жала жауып, әжесі ол екеуін үйден қуып жібереді. Кейін үйге ұры түседі. Ол саудагер мен теке болып шығады. Мысық пен күшік оралып, мән-жайдың бәрін түсіндіреді. Үшеуі бірігіп жоспар құрып, саудагер мен текенің сазайын береді.
Қойылымды заманауи ән-бимен әрлеген актерлар кішкентай көрермендерді баурап алды. Қала мектептерінің 1-сынып оқушылары мен балабақша тәрбиеленушілері спектакльді тапжылмай отырып тамашалады.
–Көктем, жаз айларында аудандарға барып, кішкентай көрермендерді қуантуды жоспарлап отырмыз. Қойылым арқылы балалардың бойына ақ пен қараны ажырата алатын иммунитет қалыптастырғымыз келеді. «Тентек текеде» танымайтын адамға сенбеу, аңқау болмау, жаман әдеттерден бойыңды аулақ ұстау сынды күнделікті өмірде басымыздан өтуі мүмкін оқиғалар суреттеледі, – дейді режиссер Асылхан Разиев.
Рабиға ЕРАЛЫ,
«Soltüstık Qazaqstan».