Өңір басшысы Ғауез Нұрмұхамбетов жұмыс сапарымен Жамбыл ауданында болды. Облыс әкімі орақ науқанының барысымен, тауарлы-сүт фермасының құрылысымен және жол жөндеу жұмыстарымен танысты.
Бүгінде аудандағы 312 мың гектар егіс алқабының 35 пайызынан өнім жиналған. Жоғары технологияларға иек артқан шаруалар мол өнім алып отыр. Мұнда алқаптарды химиялық өңдеу, зиянкестермен күрес, сұрып жаңарту және минералды тыңайтқыштар енгізу көрсеткіштері артқан.
– Шаруаларды қаржыландыру шарасы алдағы қараша айында басталады. Бұл – Мемлекет басшысының тапсырмасына сай енгізілген жаңашылдық. «Даму» қоры диқандарға берілетін қаржының 85 пайызына дейін кепілдендіреді. Бұл – үлкен қолдау, – деді Ғауез Торсанұлы.
Өңір басшысы жамбылдық шаруалармен кездесу барысында астықтың көлемімен қатар сапасына да мән беру керектігін айтты. Жазда шуақты күндердің аз болуы алтын дәннің сапасына кері әсер еткен. «Шатило және К» серіктестігінің директоры Олег Адамның сөзінше, еуропалық сұрыпты бидайдан алған өнімнің көбі төртінші сыныпты. Олар отандық сұрыптарды оруға әлі кіріспеген. Былтыр гектарынан 29 центнер өнім жинаған диқан биылғы көрсеткіш одан да жоғары болуы тиіс екенін жеткізді.
Ауданда тауарлы-сүт фермасының құрылысы жүргізілуде. Жоба былтыр тамызда қолға алынған. Жоспарға сай мұнда жылына 2 мың тоннаға дейін сүт өндіруге мүмкіндік бар.
– Құрылыста 20 шақты адам жұмыс істеп жатыр. Нысанды биыл пайдалануға береміз деп жоспарлап отырмыз. Бүгінге дейін жобаның бірінші кезеңі аяқталды. Екі апта бұрын екінші кезеңін бастадық. Құны – 2,5 млрд. теңге. Кешенге алғашқы ірі қара 20 қазанда әкелінеді, – дейді «ЮГВА» серіктестігі директорының орынбасары Даниил Семенов.
Ғауез Торсанұлы Мамлютка-Қостанай бағытындағы жолды жөндеу барысымен танысты. Биыл бұл жолдың 63 шақырымы ретке келтіріледі. Мердігерлердің айтуынша, тиісті жұмыстың жартысы аяқталған. Жоба құны – 7,5 млрд. теңге. «ҚазАвтоЖол» АҚ облыстық филиалының директоры Талғат Смағұловтың сөзінше, жұмысшылар күніне 2 шақырым жолға асфальт төсеп үлгереді. Мамлют, Жамбыл ауданының аумағымен өтетін жолды екі бригада жөндеп жатыр. Өңір басшысы жол жөндеу жұмыстарын ерекше бақылауда ұстап, мерзімінде аяқтауды тапсырды.
Облыс әкімінің баспасөз қызметі.