Домбыра, сазсырнай, жетіген, нар қобыз, шаңқобыз – атадан мұраға қалған бұл аспаптардың қоңыр үні жан дүниеңді толқытып, жүректі тебірентеді. Әдемі әуен табиғатты тәтті сезімге бөлеп тұрғандай. Жер-Анаға жан бітіп, тіршілік атаулы қайта түлеген көктеммен қауышу, бірнеше аспапта шебер ойнайтын өнерлі жігіттің шабытына шабыт қосқандай.
Біз облыстық филармонияда жұмыс істейтін Айдос Ақылбеков жайлы айтып отырмыз. Ол – өңірдегі таңдаулы өнерпаздың бірі. Өйткені, Қызылжарда мұндай кәсіби мамандар көп емес.
Жезқазған қаласының тумасы Айдос – Қазақ ұлттық өнер университетін тамамдаған. Алдымен туған жерінде музыкалық училищеде, кейін жоғары білім алған азамат өнер жолын Қызылжардан бастауды жөн көрген. Белгілі өнер қайраткері, Әлқуат Қазақбаев сынды ұстаздан тәлім алған ол шәкірттік парызына адал. Сондықтан өнер жолында биік белестерге ұмтылуды алдына мақсат еткен. Колледжде білім алған жылдары түрлі аспаптарда ойнауды үйренген.
– Осыдан он жыл бұрын өзімнің курстасым Жәмила есімді сұлумен отбасын құрдым. Сол жылы желдің өтінде, елдің шетінде тұрған Қызылжар өңірінен шақырту алдық. Аққайыңдар өлкесі бізді құшақ жая қарсы алды. Жас отбасы ретінде пәтер берді, – дей келе Айдос Ақылбеков бұл өнер атадан берілген қасиет екенін айтты. Отбасында үш ағайынды болса, үшеуі де өнерлі. Анасы Гүлзада ән айтады.
Жоғарыда айтып өткенімдей, бірнеше үрмелі, шертпелі аспапта ойнауды үйренген ол аз уақыттың ішінде көрерменнің ыстық ықыласы мен қошеметіне бөленді. “Өнерлі өрге жүзер” демекші, шетелдік көрермендерді де таңғалдырған сәттері аз болмады. Ресей, Франция, Хорватия, Словения, Германия елдерінің сахнасында өнер көрсетіп, қобыздың сиқырлы үнімен көпшіліктің көңіліне қуаныш сыйлады. Халықтың күйініші мен сүйінішін, ой-арманын, мақсат-мұратын өнер арқылы өрнектей білген сегіз қырлы бір сырлы жігіт ұлтымыздың музыкалық мұрасы бай екенін мақтан тұтады.
Өмірдің сырын күй тілімен жеткізген өнерпаздың алға қойған мақсат-мұраты ұшан-теңіз. Облыстық филармонияның “Сегіз сері” атындағы қазақ халық аспаптар оркестрі мен “Әлқисса” фольклорлық ансамблінің құрамында өнер көрсетіп жүрген оның жекеменшік жетіген сыныбын ашпақ ойы да бар.
Ақмарал ЕСДӘУЛЕТОВА,
“Soltústik Qazaqstan”.
Суретті түсірген
Талғат ТӘНІБАЕВ.