Бүгінгі таңда ерекше құрылымымен, білім мен тәрбие беру үлгісімен, жетістіктерімен ерекшеленіп жүрген тәуелсіздіктің құрдасы, №17 ұлттық өркендеу мектеп-кешенінде басқа этнос өкілдерінің оқушылары өз құндылықтарын еркін меңгеріп өсіп келеді. Өз ана тілдерінде еркін сөйлеп, биік шыңдарды бағындырып жүргендері де бар. Осыдан 25 жыл бұрын тұсауы кесілген мектебімізде әр этнос өкіліне өз таңдауына сай кез келген тілді меңгеруге жағдай жасалған. Тәуелсіз елімізбен бірге жасасып келе жатқан білім ошағы бірлік пен бейбітшілікті насихаттайды. “Қазақстан – біздің ортақ үйіміз” деген бірлікке, татулыққа, достыққа шақырған ұғым мектептің табалдырығын аттаған әр оқушы, мұғалім мен ата-ананың санасына берік орныққан.
Егемен Қазақстан көшесіндегі кең, жарық ғимаратта орналасқан мектепте 39 сынып бар, оның 8-і жаңа модификация бойынша жабдықталған. Мультимедиялық-лингафон кабинеті, екі дене шынықтыру залы, тағы сонша шеберхана, акт залы, кітапхана, асхана – бәрі бүгінгі талапқа сай. 124 компьютердің жартысына жуығы интернет жүйесіне қосылған. Үстіміздегі оқу жылында мектепте 43 сынып жинақталды. Оның 10-ы – қазақ тілінде білім беретін сыныптар. Мектепте “Қарлығаш” шағын орталығы, ұлттық бөлімдер, этномәдениет мұражайы, қысқы бақ жұмыс істейді. “Балапан” бағдарламасы негізінде ашылған “Қарлығаш” шағын орталығындағы екі топтың бірі қазақ тілінде білім мен тәрбие береді.
№17 ұлттық өркендеу мектеп-кешенінде тоғыз этностық бөлім жұмыс істейді. Оларға армян, әзірбайжан, поляк, шешен-ингуш, қазақ, кәріс, неміс, татар және украин этностарының 207 баласы келеді. Солардың ішінде 38-і – М.Қозыбаев атындағы Солтүстік Қазақстан мемлекеттік университеті мен колледждерден, 89-ы – қала мектептерінен, 71-і – біздің мектептің оқушылары және 18-і – мектеп жасына дейінгілер. Ұлттық бөлімдер Қазақстан халқы облыстық ассамблеясының хатшылығымен келісілген, Петропавл қаласының білім бөлімі бекіткен жеке оқу жоспары бойынша жұмыс істейді. Оқу бағдарламасы апта бойы (жексенбі күнін қоса алғанда) оқушылардың негізгі сабақтардан бос уақыттарын есепке ала отырып, кесте бойынша филология, қоғамтану, өнер, технология және әдеп (мәдениеттану, салт-дәстүр) білім салаларын қамтиды. Ұлттық бөлімдерде оқитын өскелең ұрпақтың зияткерлік және шығармашылық әлеуетін қалыптастырады.
Білім ошағындағы этномәдениет мұражайында тәрбиелік және ғылыми-танымдық құнды материалдар жинақталған. Ондағы жәдігерлер өткен мен қазіргінің арасындағы байланысты нығайтуға, бүгінгі мен болашақты көрсетуге жәрдемдеседі.
Мектеп-кешені жыл сайын алыс-жақын шетелдерден, Қазақстанның басқа өңірлерінен делегациялар қабылдайды. Ұлттық өркендеу орта мектеп-кешенінің жұмысына Қазақстан халқы Ассамблеясы, білім ұжымдары, этномәдени бірлестіктер, облыс, қала қонақтары тараптарынан үлкен қызығушылық бар. Білім және ғылым министрлігінің өкілдері, Қазақстан Республикасы Парламентінің депутаттары, Қазақстан халқы Ассамблеясының делегациясы, Германия, Белоруссия, Польша елдерінің елшілері әр жылдары білім ошағында қонақта болды. Олар жас ұрпақты ұлттық мәдениеттің жауһарларын бағалауға, сақтауға, насихаттауға, бірге тұратын этностардың салт-дәстүрін құрметтеуге, сыйлауға үйретіп жатқан мектеп жұмысына оң баға берді.
Бірлік, патриотизм, достық, келісім, белсенділік, шығармашылық ұғымдары мектебіміздің тәрбиелік жүйесін сипаттайды. “Бірлік бар жерде, тірлік бар” деген даналықтың шындығына бүгінде бәріміздің көзіміз жетті. Қазақстан – Елбасы Нұрсұлтан Назарбаевтың жүргізіп отырған саясатының арқасында жүз отыздан астам этнос өкілдерін бір шаңырақ астына біріктіріп, татулықта өмір сүруде. “Жұмылғанда жұдырық, ашылғанда алақан” болып отырған біздің ұжым да Елбасы саясатын қолдап, сан түрлі этнос өкілдері жастарын ортақ Отан, бір ұлттық мүдде мен мақсат жолына жұмылдыруға белсене атсалысуда.
Ләззат ЖАЛМҰҚАНОВА,
№17 ұлттық өркендеу-мектеп
кешенінің директоры.