Облыс әкімі Ғауез Нұрмұхамбетов Жұмысшы кентіндегі темір жолдың үстімен салынып жатқан көпір құрылысының барысын тексерді. Бүгінгі таңда жол өткелінің қаңқасы дайын. Сонымен қатар үйінді қабатын қалыптастыру, тіреу қабырғасын орнату, суағар жүйесін құру жұмыстары қарқынды атқарылуда.
Бастапқыда құрылыстың аяқталуы осы жылдың соңына жоспарланған болатын. Алайда бас мердігердің жауапсыздығы мен заңнама нормаларын бұзуы салдарынан қалалық әкімдік келісімшартты бұзды. Осы факт бойынша материалдар құқық қорғау органдарына жолданып, тергеу амалдары жүргізілуде.
Енді құрылыс жұмыстарын «Құрылыс Сервис» ЖШС аяқтайтын болады. Нысанды қалпына келтіруге 40-тан астам маман мен 30 техника жұмылдырылған. Құрылыстың сапасы басты назарда, техникалық қадағалауға алынған.
Асфальт жабындысын төсеу, аумақты көгалдандыру келесі жылы аяқталады. Нысанды пайдалануға беру 2026 жылдың жазына белгіленген.
Өмір ЕСҚАЛИ,
«Soltüstık Qazaqstan».