Сан ғасырлық тарихында талай сын-қатерлерге төтеп берген халқымыз тағы бір қиындыққа тап болып отыр. Бүкіл әлемді жайлаған қауіпті індет қалыпты тіршілігімізді бұзып, небір тосын жайларды алға тартуда. Осындай қысылтаяң шақта халқына сөз арнаған Елбасы Нұрсұлтан Назарбаев баспасөз бетінде жарияланған “Бірлесе білген ел бәрін жеңеді” атты мақаласы арқылы бәрімізді қиындықтарды жеңуге жұдырықтай жұмылуға, “бір жағадан бас, бір жеңнен қол шығарып”, сабырлылық пен байыптылық танытуға шақырып отыр.
Нұрсұлтан Әбішұлы – халқымды төрге оздырсам, өзге елдермен терезесін тең қылсам деп, аянбай тер төгіп жүрген ерен тұлға. Біз оның қамқорлығын ұдайы сезініп келеміз. Осы жолы да қоғамның ауызбіршілігі ғана қиындықты еңсеруге жол ашатынын жүрегімізге жеткізді. “Өмірдің өзі, дәл бүгінгі қалыптасқан жағдай біз ұстанған бірігу мен бірлесуге негізделген саясаттың бірден-бір дұрыс жол екендігіне көзімізді жеткізіп отыр. Қазақстан халқының бірлігі мен татулығы елімізде ғана емес, әлемді шарпыған қиын кезеңде бір-бірімізге қамқор болып, қолдау көрсетуге міндеттейді. Қамқорлық, қайырымдылық – қазақ халқына тән қасиет”, – дейді Елбасы.
Заман өзгеріп, ұрпақ ауысқанымен, қуат алар тамырымыз бір болғандықтан, атадан балаға ауысқан кеңпейілді көңілімізді кір шалмауы тиіс. Ұлттық болмысымызға сәйкес аға буынға қамқорлығымызды танытып, мұқтаж жандарға қол ұшын беруіміз керек. Елбасының: “Жаңа өскін – жас ұрпаққа айтарым: тәуелсіздік жылдары дүниеге келген сендер келер жылы орда бұзар отызға толасыңдар. Еліміздегі ең қуатты күш – өздеріңсіңдер. Аға ұрпақ сендер үшін қолдан келгеннің бәрін жасады, енді сендердің де күш-қайрат жұмсайтын кездерің келді. Жамандықтан, жат әдеттен сақтанып, игі істер жасауға ұмтылыңдар. Үлкенге – ізетті, кішіге – қамқор, бір-біріңе дос болыңдар. “Біріңді қазақ бірің дос, көрмесең – істің бәрі бос” деген Абай аталарыңның өсиетін ешқашан естен шығармаңдар”, – деп өскелең ұрпақты жақсылыққа үндеуі кімді де болсын тебірентері анық.
Елбасы халықтың жағдайына алаңдап, елдің дамуына, экономикалық және әлеуметтік үдерістердің жүзеге асырылу барысына баса назар аударып, өзінің өмірлік тәжірибесімен бөлісіп отыр. Қазақстандықтар әр кез мемлекет қамқорлығынан шет қалған емес. Бүгінгі таңда да аз қамтылған, көпбалалы отбасыларға, мүмкіндігі шектеулі жандарға, жетімдерге, жалғызбасты зейнеткерлерге, ардагерлер мен көмекке мұқтаж жандарға жан-жақты қолдау көрсетілуде.
Біздің өңірімізде еріктілер 1200-ден астам адамға көмек көрсетті. Бұл бағыттағы жұмысымыз тоқтамайды, қиын жағдайға тап болған жерлестерімізге алдағы уақытта да қол ұшын береміз.
Өткен аптада “Birgemiz-Qyzyljar” қоғамдық қоры өз жұмысын бастады. Осы қор арқылы өңіріміз бойынша 3500-ден астам адамға көмек көрсетілетін болады. Жарияланған карантин уақытында қолдауға зәру азаматтарға материалдық көмек ретінде 50 мың теңге көлемінде қаржы беріледі. Қорға қаржыны меценаттар, бизнесмендер мен жомарт жандар орталықтандырылған жүйе бойынша аударады.
Елбасымыз Қазақстан қауіпті дерттің алдын алуға әлемде алғашқылардың қатарында кіріскенін атап өтті. Сақтандыру шараларына қысқа мерзім ішінде медицина қызметкерлері, коммуналдық қызмет мамандары, полицейлер бір кісідей жұмылды. Мемлекеттік органдар арнаулы дайындықтан өткізілді. Өзге елдерде вирус қалай пайда болып, өршігені бақыланды. Соның нәтижесінде індеттің етек алып кетуіне мүмкіндігінше жол берілмеуде. Қауіпті дертке шалдыққандар құлан-таза айығып, қатарға қосылуда. Жағдайды оңалту үшін көп жұмыс істелді, әлі де талай шаруа атқарылатын болады.
Тәуелсіздік жылдары елімізде денсаулық сақтау саласын дамытуға айрықша көңіл бөлінді. Барлық өңірде бұрын болмаған жүздеген заманауи ауруханалар мен емханалар, медициналық орталықтар салынды. Олар әлемдік деңгейдегі ең озық техникалармен жарақтандырылып, жоғары білікті мамандар даярланды. Осындай жұмыстардың нәтижесінде ұлт денсаулығына қатер төндірген бүгінгідей қиыншылық заманда жұқпалы дерттің дәл диагностикасын жасау, оның алдын алу, науқасты емдеу сияқты тиісті шараларды біздің дәрігерлеріміз жоғары кәсіби деңгейде атқаруда.
Мемлекет басшысы Қасым-Жомарт Тоқаев та халықтың еңсесі түсіп, қиналмауы үшін бар жақсылықты жасауда. Жұмыссыз қалған тұрғындарға әлеуметтік төлем берілуде. Билік материалдық және моральдық тұрғыдан жұртшылыққа көмек беруден аянып қалмайды.
Елбасы мақаласы бізге бүгінгідей қысылтаяң шақта айқын бағдар болары анық. Нұрсұлтан Назарбаев әрқашан өз халқының жүрегіне сенім, көңіліне үміт ұялатып, небір қиындықтарды жеңуге үндеп келеді. Осы жолы да жұдырықтай жұмылып, бар ауыртпалықты еңсерерімізге сенеміз. Ел ішіне үрей таратып, байбалам салушылардың сөзіне сенбеуіміз керек. Өңірімізде жарияланған төтенше жағдай – біздің қауіпсіздігіміз үшін қажет уақытша шара. Сондықтан халқының амандығын ойлаған мемлекеттің қабылдаған шешімдеріне түсіністікпен қарап, шыдамдылық танытайық.
Әсем РАХМЕТОВА,
“Nur Otan” партиясы облыстық филиалы төрағасының бірінші орынбасары.