Шұжық өнімінің 130-дан астам түрін шығаратын жергілікті “Казмясопродукт” кәсіпорны Мәскеуде өткен 28-халықаралық “Worldfood Moscow” азық-түлік көрмесіне қатысып, үш бірдей алтын медальға ие болды.
Серіктестіктің бас технологы Юлия Гончарованың айтуынша, кәсіпорын көрме талаптарымен таныса келе үш аталымға қатысуды жөн санаған.
– Көрмеге әлемнің 65 елі 584 түрлі өнімін қойды. “Ет өнімдері және консервілер” бөлімінде біз әлемнің 35 компаниясымен сынға түстік. Бірінші күні өніміміз зертханада сынақтан өтті. Кейін арнайы комиссия сарапшылары дәмін көрді, – деді ол.
Солтүстік Қазақстаннан апарған үш өнім де байқаудың қорытындысы бойынша алтын медальға ие болған.
– Өнімдеріміз лайықты бағасын алатынына сендік, бірақ үш бірдей алтын аламыз деп ойлаған жоқпыз. Біздің барлық өнімдеріміз талапқа сай әзірленеді. Арнайы дәмдеуіштерді көп қоссақ, тексерістен өтпес еді. Біз шұжықтарды байқауға арнайы әзірлеген жоқпыз, бәрін сөреден алдық, – дейді ЖШСнің директоры Серік Ілиясов.
Өңірімізде жұмыс істеп жатқанына 14 жыл болған кәсіпорын бір айда 100 тонна өнім шығарып, оны облыс орталығындағы 9 фирмалық дүкенде және сауда орындарында сатады. Нұр-Сұлтан қаласында да серіктестіктің арнайы дүкені бар.
– Ресейдің Екатеринбург, Санкт-Петербург және Мәскеу қалаларының өкілдерімен келіссөздер жүргізіп жатырмыз. Біздің өнімді ұнатқан олар енді әріптестік қарым-қатынас орнатпақ ниетте, – дейді Серік Ілиясов.
Гүлмира ШОҚТЫБАЕВА,
облыстық кәсіпкерлер палатасының баспасөз хатшысы.