Облысымызда осыдан төрт жыл бұрын құрылған “Әйелдер көшбасшылығы мектебі” бүгінде жүйелі түрде жұмыс істеуде. Аталмыш мектептің заман талабынан қалмай, қоғамдық шараларға белсенді түрде қатысатын қыз-келіншектер үшін пайдасы зор. Қазір мұнда келушілердің саны 200-ге жуық. Жақында “Әйелдер көшбасшылығы мектебінің” ұйымдастырушылары өзінің кезекті жиынын өткізіп, “Гендер және саясат”, “Бір әйелдің қолынан не келеді?” деген тақырыптар төңірегінде мәнді, маңызды әңгіме қозғады.
– “Әйелдер көшбасшылығы мектебінің” құрамына кез келген салада қызмет ететін нәзікжандар кіре алады. Биыл біз өңіріміздегі ұжымдарда 12 сабақ өткіземіз. Мұнда қыз-келіншектердің қоғамдық-саяси өмірде белсенді болуына кеңестер айтылып, қолдау көрсетіледі, – дейді “Нұр Отан” партиясы облыстық филиалы төрағасының орынбасары Елена Балло.
Жиында әйелдердің көшбасшылық қабілеттерін арттыру және қоғамдағы беделін көтеру бағытында атқарылатын жұмыстар жайлы сөз қозғалды.
– Елімізде ұлттық гендерлік саясат жақсы жолға қойылған деп айтуға болады. Бұл ұғымның тек әйелдерге ғана емес, сондай-ақ, ер-азаматтарға да қатысы бар екенін түсінуіміз керек. Сол себепті, арнайы тренингтерге қыз-келіншектермен қоса, ерлердің де қатысқаны дұрыс, – дейді Астана қаласынан келген “HuMan Nomad” гуманистік менеджмент институтының халықаралық сарапшысы Ләззат Асқарова.
Құттықыз ҚҰСЕНОВА.