Біріккен Ұлттар Ұйымы 1990 жылдың қараша айының екінші бейсенбісін Дүниежүзілік сапа күні деп белгілеген болатын. Сапа – ел экономикасын дамыту мен тұтынушылардың қауіпсіздігін қамтамасыз ету негіздерінің бірі болып саналады. Мемлекет басшысының Жарлығымен жыл сайын Президенттің “Алтын сапа” сыйлығы беріледі, “Қазақстанның үздік тауарлары” байқауы өткізіледі.
Облыстық техникалық реттеу және метрология департаментінің басшысы Василий Чепухин өңірімізде өнімдері немесе қызметі тұтынушылардың көңілінен шығып жүрген бірқатар кәсіпкерлік субъектісін Алғыс хатпен марапаттады. Департаменттің негізгі міндеті өнімдердің сапасына мемлекеттік бақылау жасау және ішкі нарықтағы тауарлар мен қызмет түрлерінің қауіпсіздігін қамтамасыз ету болып табылады. Осы келелі міндеттерді жүзеге асыру барысында мекеменің атқарып жатқан жұмыстары аз емес. Мемлекеттік инcпекторлар нарыққа сапасыз өнім шығарғандардың жолын кесіп, тиісті шаралар қабылдайды. Бірақ осынау мерекелі күні олар жұмыстарын оң жағынан көрсетуді жөн көрді. Сапалы өнімдерімен өңір экономикасына, әлеуетіне сүбелі үлес қосып отырған тауар өндірушілерге ризашылықтарын білдірді. Солардың ішінде 2015 жылғы “Алтын сапа” сыйлығының жеңімпазы Петропавл ауыр машина жасау зауытының, биылғы “Қазақстанның үздік тауары” байқауынан жүлделі болған “Сұлтан” ұн-үгу комбинатының, С.Киров атындағы зауыттың, Петропавл құрылыс материалдары зауытының, “В.Макаров” мен “В.Левин” жеке кәсіпкерліктерінің аттары ерекше аталды.
Ішкі нарықтағы тауарлар мен қызмет түрлерінің халықаралық стандарттарға сәйкестігін қамтамасыз ету, қауіпсіз тауарды немесе қызметті тұтыну, отандық тауарлардың сыртқы бәсекелестіктегі қабілеттілігін арттыру мәселесі сапа көрсеткіштеріне келіп тіреледі. Техникалық реттеу, санитарлық және фитоснитарлық шаралар бойынша елімізде заңдар мен құқықтық кеңістік қалыптастырылған. Олардың жүзеге асырылуына тұтынушылар құқығын қорғайтын мекемелердің қосып отырған үлесі зор. Облыстық тұтынушылардың құқығын қорғау департаменті басшысының орынбасары Татьяна Горлова отандық және шетелдік тауарлардың ішінде сапасыз өнімдердің аз кездеспейтінін тілге тиек етті. Олардың міндеті – нарықта сатылатын тауарлардың сапасын тексеру. Осы мақсат үшін мемлекеттік қор департаментке биыл тиісті қаржы бөлген. Тұтынушылардың құқығын қорғаушылар кез келген тауарды сатып алып, оған зертханалық-сараптамалық тексеріс ұйымдастырған кезде, көптеген тауарлардан сапасыздықтар анықталып жатады. Әсіресе, тауарлардың сыртқы орамалары сын көтермейтіндігі айтылды. Сондай-ақ, балалардың киімдері мен ойыншықтарынан денсаулыққа зиян келетін улы заттар жиі анықталады екен.
Дүниежүзілік сапа күніне арналған жиын сапалы тауар өндірушілер мен қызмет көрсетушілерді марапаттау рәсімімен аяқталды.
Гүлгүл ҚУАТҚЫЗЫ,
“Солтүстік Қазақстан”.