Кәсіпқой бокстан “IBF” және “IBO” нұсқалары бойынша орта салмақтағы әлем чемпионы Геннадий Головкин жапониялық Рёта Муратамен жұдырықтасуы мүмкін.
“Boxingnews24.com” сайты таратқан ақпаратқа сенсек, қазақстандық боксшының промоутері Том Леффлер бұл күндері келіссөздер жүргізіп жатқан көрінеді. Егер қос тарап ортақ мәмілеге келген жағдайда, жанкүйерлер алдағы уақытта Геннадий Головкин мен Рёта Мурата арасындағы жекпе-жекті тамашалауы мүмкін.
Күн Шығыс елінің өкілі Рёта Мурата 2013 жылдан бері кәсіпқой рингте бақ сынауда. Шаршы алаңға 17 мәрте көтерілген ол 15 рет жеңіске жетсе, соның 12-сін мерзімінен бұрын аяқтаған. Жапон жігіті соңғы екі жекпе-жегін америкалық Роб Брантқа қарсы өткізіп, 2018 жылдың 20 қазанында ұтылса, 2019 жылдың 12 шілдесінде есе қайтарды. Бұл күндері Мурата “WBA” нұсқасы бойынша әлем чемпионы тәжінің иегері.