Елбасы Жолдауын түсіндіру мақсатымен Қызылжар өңіріне келген Парламент Мәжілісінің “Нұр Отан” партиясынан сайланған депутаттары партияның облыстық филиалында жергілікті мәслихаттардағы әріптестерімен кездесті.
Кездесуді партияның облыстық филиалы төрағасының бірінші орынбасары Артур Молдағұлов ашып, Мәжілістің бір топ депутаттарын бастап келген Серікжан Қанаевқа сөз берді. “Еліміз әлемде әлі жалғасып жатқан экономикалық дағдарысқа қарамастан, өз алдына өршіл мақсаттар қойып отыр. Елбасымыз Қазақстан халқы Ассамблеясының жуырда болған ХХІ сессиясында тағы бір мәрте атап айтқанындай, ортақ табысымыздың кепілі – қоғамдағы тұрақтылық пен келісімді сақтау. Қазір халқымыздың ынтымақ пен бірлігіне сына қағып, іріткі салу мақсатын көздейтін кейбір саяси күштер сырттан арандату әрекеттеріне барып отырған жағдайда біз өте сақ болуымыз керек”, – деп әңгіме бастаған Серікжан Зиаданұлы жергілікті мәслихаттардың депутаттарын ашық пікір алысуға шақырды.
Облыстық мәслихаттың депутаты Еркебұлан Мәмбетов мәжілісмендер назарын ауылдық жерлерде мал өсірумен айналысқысы келетін шағын және орта бизнес өкілдерінің қолданыстағы Экологиялық кодекске сәйкес рұқсат қағазын алуы өте қиын екендігіне және бұл үдерісті жеңілдетпейінше, мал шаруашылығын алға бастыру оңайға соқпайтындығына аударды.
(Өз тілшімізден).