Өңірде бес ай ішінде 27 тұрғын ақшасын «инвестицияға» салып, алаяқтарға алданды. Облыстық полиция департаменті баспасөз қызметінің мәліметінше, «ақшаны көбейту», «инвестиция» және тез табыс табуды уәде ететін өзге де интернет-алаяқтық схемалар соңғы кезде белең алған.
– Әлеуметтік желілерде жеңіл жолмен табыс табу туралы жарнамалар жиі кездеседі. Жарнамадағы сілтемеге өткен соң, алаяқтар WhatsApp арқылы хабарласып, өздерін инвестициялық немесе кеңес беру компаниясының қызметкерлері ретінде таныстырады, «болашағы зор биржалық мәмілелерге» ақша салуды ұсынады.
Жәбірленуші арнайы интернет-ресурста тіркеліп, «жеке кабинеті» арқылы табысының өскенін көреді. Шын мәнінде оның ешқандай маңызы жоқ, алайда кей адамдар үлкен несие алады, таныстарынан қарыз сұрайды, – дейді полиция қызметкерлері.
Мәселен, Петропавл қаласының тұрғыны «биржалық ойындарға» 19 млн. теңге аударған. Доллармен есептелген «табысы» үнемі өсіп отырған, бірақ ол ақшасын алмақ болғанда, алаяқтар байланысқа шықпай қойған.
Полицейлер интернет пен әлеуметтік желі қолданушыларын «жеңіл табыс табу» туралы уәдеге сенбеуге және бейтаныс адамдарға ақша аудармауға шақырады.
Ақерке ДӘУРЕНБЕКҚЫЗЫ,
«Soltüstık Qazaqstan».