Мемлекеттік кірістер комитеті өңірлердегі салық кеңесшілерінің байланыс нөмірлерін жариялады.
«Жіберілген SMS-хабарламада жеке тұлғалардың шоттарындағы берешек және артық төлемдері көрсетіледі. «SMS хабарламалар» тарату қызметі қанатқақты режімде жеке тұлғаларды салық міндеттемелері туралы уақтылы хабардар ету мақсатында іске қосылды», делінген хабарламада. Комитеттің мәліметінше, SMS хабарлама жеке тұлғаларға салық міндеттемелері туралы ескертпені жедел жеткізеді. Оның тағы бір артықшылығы – бұл қызмет барлық ұялы телефондарды пайдаланушыларға қолжетімді. Осындай хабарлама Kaspi Bank мобильді қосымшасы арқылы жіберіледі. Салық органдары 2018 жылға есептеген және 2019 жылдың 1 қазанынан кешіктірмей төленуі тиіс салық сомасы (мүлік салығы және жер салығы) туралы хабарламаны азаматтарға коммуналдық қызметтерді жеткізуші курьерлік қызметі арқылы да жібереді. Сондай-ақ, хабарламалар ҚР Қаржы министрлігі Мемлекеттік кірістер комитетінің «Салық төлеушілер кабинеті» қызметін пайдаланушыларға электронды түрде жіберіледі. Жеке тұлғалар 2018 жыл үшін жер және мүлік салықтары бойынша ақпаратты «Egov» порталының «Салық және қаржы» бөлімінің «Жеке тұлғалардың алдағы төлемдерін көру және төлеу» қызметінде, kgd.gov.kz сайтындағы «Барлық қызметтер» бөліміндегі «Мемлекеттік кірістер органдары есеп жүргізетін алдағы төлемдер мен берешектің жоғы (бар) туралы ақпарат» бойынша алады. Сонымен қатар, тұрғылықты жері бойынша Мемлекеттік кірістер басқармаларына шағымдануға немесе 1414 нөміріне сағат 09:00-18:30 аралығында хабарласып, Мемлекеттік кірістер басқармасы қызметкерлерімен байланысқа шығуға мүмкіндік бар. Айта кетерлігі, жеке тұлғалар салықты кез-келген ыңғайлы жолмен төлей алады: екінші деңгейдегі банк бөлімшелерінде немесе төлем терминалдарында қолма-қол ақшамен, банкоматтар мен төлем терминалдарында банк картасын қолдана отырып www.kgd.gov.kz сайтындағы электронды қызметтер бойынша төлеуге болады. Анықтама алу үшін жеке тұлғалар бірыңғай байланыс орталығының ақысыз нөміріне – 1414 жүгіне алады.
www.inform.kz