Сәуір айының соңында жүзуден “Champions Swim Series” атты жаңа әлемдік турнирдің бірінші кезеңі өтеді. Оған Қазақстаннан тек Дмитрий Баландин шақырту алды.
Әлемдік турнир қатысушыларының тізімінде Олимпиада чемпиондары, әлем біріншіліктерінің жеңімпаздары бар.
Жарыс үш кезеңнен тұрады. Алғашқы бәсеке 27 сәуір күні Қытайдың Гуанчжоу қаласында өтеді. Турнирде 2019 жылы өтетін әлем чемпионаты мен 2020 жылғы Олимпиада ойындарына қатысу мүмкіндігін беретін жолдамалар сарапқа салынады.
Жеңімпаз спортшыға – 10 мың, күміс жүлдегерге – 8 мың, ал қола жүлдегерге 6 мың АҚШ доллары мөлшерінде сыйақы беріледі.