Өңірде 3409 түлек мектеп бітіріп, үлкен өмірге қадам басты. Облыс әкімі Құмар Ақсақалов мұғалімдер мен оқушыларды оқу жылының аяқталумен онлайн режімде құттықтап, ақ тілегін арнады. “25 мамыр – оқушы өміріндегі ерекше күн. Мектеп – алаңсыз балалық шақ пен жастық, алғашқы жеңістер мен жетістіктердің уақыты. Түлектердің алдында көптеген мүмкіндіктер мен маңызды шешімдер тұр: емтихан тапсыру, мамандық және университет таңдау. Мұғалімдер үшін соңғы қоңырау мерекесі де ерекше, өйткені әр балаға көп күш, қамқорлық пен білім беріледі. Мен бірінші ұстазым – Юлия Ивановнаны әрдайым ризашылықпен еске аламын”, – деді Құмар Іргебайұлы құттықтау сөзінде.
Биыл облыстағы 73 мыңнан астам оқушы үшін оқу жылы аяқталды. Олардың 3409-ы – 11 сынып түлектері болса, 153-і “Алтын белгіден”, 112-і үздік аттестаттан үмітті.
Білім басқармасының мәліметінше, былтыр да “Алтын белгіден” 153 түлек алған. Үздік аттестатқа былтыр 111 түлек қол жеткізсе, биыл үміткерлер саны бір түлекке артты. “11 сынып оқушылары үшін мемлекеттік емтихандар 1-10 маусым аралығында өтеді. Емтихандар саны да азайды. Түлектер бес емтиханның орнына 4 емтихан тапсырады. “Алтын белгіден” үміткерлердің эссе, алгебрадан жазбаша емтихан жұмыстарын білім басқармасы жанынан құрылған комиссия тексереді. Мемлекеттік емтихандар кезінде “COVID-19”-бен ауырған түлектер қорытынды аттестаттаудан босатылады”, – деді облыстық білім басқармасының басшысы.
Өңірде ертеңнен жазғы мектептер жұмысын бастамақ. 19 маусымға дейін негізгі пәндер бойынша сабақтар ұйымдастырылады. Биыл Ұлттық бірыңғай тестілеуді барлық мектеп түлегінің 72 пайызы тапсыруда. ҰБТ-да жоғары балл алмағандарға грантқа оқуға мүмкіндік бар. Облыс бюджетінен өңірге қажетті мамандарды даярлау үшін 50 білім гранты бөлінді.
Әсел ОРАЗБАЕВА,
облыстық білім басқармасының баспасөз хатшысы.