Ұсқынсыз қасбеттер, лас аулалар кез келген елді мекеннің сыйқын бұзып қана қоймай, санитарлық жағдайға да әсер етеді. Жергілікті полиция қызметкерлері тұрғындармен, ПИК төрағаларымен, шағын және орта кәсіпкерлік субъектілерімен, қоқыс жинауды жүзеге асыратын кәсіпорын басшыларымен алдын алу жұмысын жүргізді.
Абаттандыру қағидаларына сәйкес аумақты жинау және таза ұстау бойынша уақтылы шаралар қабылдануы тиіс. Елді мекендердің аумағын абаттандыру қағидаларын сақтамағаны, инфрақұрылым объектілерін бұзғаны, жасыл екпелерді бүлдіргені үшін жауапкершілік көзделген.
Петропавл қалалық полиция басқармасының учаскелік полиция инспекторлары тексеру кезінде Промышленная, 7 мекенжайы бойынша орналасқан жеке кәсіпкерлік нысандарының біріне жақын аумақта құрылыс материалдары қалдықтарының үйіндісін көрді. Елді мекендерді абаттандыру қағидаларын бұзғаны үшін кәсіпорын иесі 83 мың 340 теңге сомасында әкімшілік айыппұл төледі. “Бұл шара бірнеше рет ескерту жасалғаннан кейін ғана қолданылады. Жыл басынан бері әкімшілік жауапкершілікке 6516 адам тартылды, оның ішінде 137 ереже бұзушыға айыппұл салынды”, – дейді полиция подполковнигі Григорий Тыш.
Нұрбек БАЕКИН,
облыстық ішкі істер департаменті ішкі және сыртқы коммуникациялар бөлімінің инспекторы.