Өңірімізде соңғы уақытта кәсіппен айналысатын қыз-келіншектердің қатары артып, бизнестегі басқарушы әйелдердің үлесі қырық пайызға жеткен. Өңір экономикасының дамуына өз үлесін қосып отырғандардың қатарында Рәшида Темірбекова да бар.
Рәшида Мағжанқызы еліміз тәуелсіздік алған бойда алғашқылардың бірі болып бизнеске бет бұрды. Сол уақыттан бері талай қиындықтарды еңсерді. Бүгінгі таңда ол кәсіпкерлікпен қатар аудандағы қоғамдық істердің ұйытқысы болып, қайрымдылық жасауға да ден қойған. Аз қамтылған отбасылар мен мұқтаж жандардың тізімін жасап, оларға қол ұшын созуға бел буыпты. “Ауданда төрт жүзден астам аз қамтылған отбасы бар. Әсіресе, көпбалалы отбасыларды назардан тыс қалдырмауға тырысамыз. Мысалы, дүкенімізде арнайы сөрелер құрып, тауарларымызды арзан бағамен сатуды қолға алдық. Оқу жылы алдында әр отбасына қаржылай көмек беруді игі дәстүрге айналдырдық. Сондай-ақ, айтулы мерекелер кезінде үй-үйді аралап, балаларға сыйлықтар таратамыз. Жалғызбасты қариялар мен мүмкіндігі шектеулі жандар үшін сауда нүктелерінде түрлі жеңілдіктер қарастырылған”, – дейді Рәшида Темірбекова.
Жеке кәсіпкердің мұндай көмегіне аудан орталығындағы білім ордаларының ұстаздары мен оқушылары дән риза. “Мен 1994 жылы тәуекелге бел буып, бизнеспен айналысуға ден қойдым. Экономика тұралап қалған кез ғой, жоқшылықтың кесірінен жұрт көшеге шығып, үйдегі заттарын сатуға мәжбүр болды. Ел ішінде жұмыссыздық орын алып, әркім өз бетінше күнкөрістің қамымен жүгірді. Осындай қиын кезең әйелдерге де үлкен жүк артты, олар ерлермен бірге отбасын асыраудың қамына кірісті. Алғашқыда осы ісімнен бірдеңе шыға ма деп күмәндандым, бірақ табандылық пен қайсарлықтың арқасында қиындықтарды еңсере білдім”, – дейді кәсіпкер.
Бүгінгі күні Рәшида Темірбекова басқарып отырған “Нұр” көтерме-бөлшек сауда-кешені аудандағы ірі кәсіпорындардың біріне айналып отыр. Кәсіпкер Уәлиханов ауданындағы наубайхана мен дәмханада және жабық базарда 50-ге жуық адамды жұмыспен қамтыған. Сондай-ақ, басқа кәсіпкерлерге бөлшек сауда алаңын жалға беріп, сенімді серіктестермен, зауыттармен және кәсіпкерлермен ұзақмерзімді келісімшарттар жасасқан.
Рәшида Темірбекова білгенін жас кәсіпкерлерге үйретіп, өз тәжірибесімен бөлісуде. Тамыз айында “Атамекен” ұлттық кәсіпкерлер палатасы Іскер әйелдер кеңесінің бесінші конгресіне қатысып, “Бизнесті дамыту тетіктері” тақырыбында баяндама жасады. Облыстық Іскер әйелдер кеңесінің белсенді мүшесі, табысты жерлесіміз көпжылғы еңбегі үшін “Атамекен” Ұлттық кәсіпкерлер палатасы төралқасының төрағасы Т.Құлыбаевтың Алғыс хатымен марапатталды. Кәсіпкердің облысымыздың әлеуметтік-экономикалық дамуына қосқан еңбегі де елеусіз қалған жоқ. Ол “Астанаға 10 жыл”, “Қазақстан Республикасының Тәуелсіздігіне 20 жыл”, “Қазақстан Республикасының Тәуелсіздігіне 25 жыл” мерейтойлық медальдарымен, “BIRINSHI” төсбелгісімен, “Ең үздік кәсіпкер әйел”, “Парыз” конкурстарының дипломдарымен марапатталған. “Жақын адамдардың қолдауынсыз, сүйіспеншілігі мен ықыласынсыз бизнестің қиындығына төзіп, бәсекелестеріңнің алды болу мүмкін емес. Үлкен табыстарға қол жеткізсем де, мен үшін отбасым, балаларым мен немерелерім бәрінен де қымбат”, – дейді Рәшида Мағжанқызы.
Бүгінде әйел – тек отбасының береке-бірлігін ойлайтын адам ғана емес, ол сонымен қатар мемлекеттің маңызды мәселелеріне белсене араласатын қоғам мүшесі. Сондықтан біздің елде әйелдің қоғамдық белсенділігіне айрықша көңіл бөлініп, білімді де білікті қыз-келіншектерге зор мүмкіндік берілуде. Кәсіпкерлік саласында ерлермен иық тіресе жұмыс істеп жүрген Рәшида Темірбекова сынды қыз-келіншектердің қатары толыға түскен сайын еліміздің де биік шыңдарды бағындырары айқын.
Зурәш АХМЕТОВА,
облыстық мәслихаттың баспасөз қызметінің маманы.