ТАСҚЫНҒА ӘЗІРЛІК ТИЯНАҚТЫ

Көктемгі су тасқынына дайындық – өзекті мәсе­лелердің бірі. Қар күрт ерісе, өңіріміздегі өзен-көл­дердің жанында ор­наласқан отыздан астам елді мекен су астында қалуы мүмкін. Сол себепті өңірімізде табиғи апат­тың алдын алуға арналған әзірлік шаралары жүр­гізілуде.

Синоптиктер биыл қар қа­лың түскендіктен, көктемде су тасқыны орын алуы мүмкін екендігін ескертеді. Сондықтан төтенше жағдайлардың алдын алуға, халықты апат салда­рынан қорғауға бағытталған іс-шаралар кешені қыркүйек айы­нан бастап қолға алынды. Об­лысымызда екі мыңға жуық су айдыны бар. Негізгі қауіп Есіл, Шағалы, Сілеті, Қамысақты өзендерінен келуі мүмкін.
Үстіміздегі жылы су тас­қынына дайындық шараларына облыс бюджетінен 495 млн. теңге қарастырылған. Бұл қа­ражатқа төтенше жағдайларға қарсы күрес шараларына қа­жетті техникалар сатып алын­ған. Су тасқынының алдын алу бойынша кешенді жоспар құры­лып, жұмыстар соған сәйкес жүргізілуде. Атап айтар болсақ, жедел әрекет ету мақсатында 484 құтқарушыдан жасақтал­ған, 155 техника, 8 жүзу құралы және 72 мотопомпа бар топтар құрылды. Өз кезегінде жергі­лікті атқарушы органдар тара­пы­нан 1619 адам мен 1163 тех­ника бөлінбек. Яғни, 299 су сор­ғыш және 109 инженерлік тех­ника, 83 жүзу құралы бізге кө­мекке келмек. Жанар-жағармай мен инертті материалдар, құм салынған қаптар дайындалды.
Егер сын сағатта жергілікті мамандар немесе техника жет­кіліксіз болған жағдайда, басқа өңірлердегі әріптестеріміз көмекке келуге әзір. Сондай-ақ Ұлттық ұланның күштері мен құралдары дайын тұр. Олар төтенше жағдайлардың алдын алу және салдарын жою, тұр­ғындарға жедел көмек көрсету жұмыстарына 60 адам мен 4 техника жұмылдырмақ.
Департамент басшылығы же­ке құрамның көктемгі су тасқы­нына әзірлігін бақылауға алған. Жуырда солтүстікқазақстандық құтқарушылар сапқа тұрғы­зылып, арнайы-тактикалық оқу-жаттығу жұмыстары жүргізілді. Шара барысында өрт сөндіру және апаттық-құтқару жұмыста­ры қызметінің жасағы Ұлттық ұлан сарбаздарын құтқару опе­рацияларымен, арнайы тех­ника мен жабдықтарды пай­даланудың негізгі тәсілдерімен таныстырып, зардап шеккен­дерге алғашқы медициналық көмек көрсету жолдарын үй­ретті.

Бағлан ҰЗАҚОВ,
облыстық төтенше жағдайлар жөніндегі департаменттің азаматтық қорғаныс бөлімінің офицері.