Ғабит Мүсірепов атындағы ауданда есімі республика жұртшылығына жақсы таныс қоғам және мемлекет қайраткері Еркін Әуелбековтің 95 жылдық мерейтойына арналған ғылыми-практикалық конференция өтті. Оған Ақмола, Қызылорда, Қызылжар, Торғай өңірлерінен арнайы өкілдер, марқұмның туыстары, еңбек ардагерлері, ұстаздар, мәдениет саласының қызметкерлері қатысты.
Салтанатты жиын басталар алдында аудан орталығында орналасқан Еркін Нұржанұлының мүсініне гүл шоқтары қойылды. Орталық алаңда орнатылған ескерткіш – бар ғұмырын халыққа қызмет етуге арнаған тұлғаға деген терең құрмет пен алғыстың белгісі.
Ғылыми конференцияны облыс әкімінің орынбасары Жүсіп Жұмағұлов кіріспе сөзбен ашып, өңір басшысы Ғауез Нұрмұхамбетовтің құттықтау хатын оқып берді. Тау тұлғаның халқы үшін сіңірген еңбегіне айрықша тоқталып өтті.
«Еркін Нұржанұлы басқарған кезеңде Солтүстік Қазақстан, Көкшетау, Торғай, Қызылорда өңірлері әлеуметтік-экономикалық дамуы жағынан өркендеп, инфрақұрылым айтарлықтай жақсарды, қала мен ауыл келбеті өзгерді. Ол қай салада қызмет атқарса да, мәселелерді білгірлікпен шеше білді. Артына өшпес мұра, жарқын із қалдырды», – деді өз сөзінде Жүсіп Рахатұлы.
Солтүстік Қазақстан мемлекеттік мұрағатының директоры Сәуле Мәлікова «Еркін Әуелбеков – дара тұлға» тақырыбында баяндама жасады. Парламент Мәжілісінің экс-депутаты Бәкір Әбдіжәлел, Көкшетау қалалық ардагерлер кеңесінің төрағасы Шияп Әлиев, Солтүстік Қазақстан облысының құрметті азаматы Құдайберген Қалиев, «Тіл сақшысы» республикалық газетініңалқа мүшесі Аңсат Сәдуақас, марқұмның туған қарындасы Күләш Әуелбекова, тағы басқалары естеліктерімен бөлісті, бұра тартпайтын турашылдық, жаны мен арының тазалығы, іскерлік қасиеттері жайлыкеңінен сыр шертті.
Ауданның құрметті азаматы Мәрияш Тасмағанбетова Жаңасу ауылындағы Еркін Нұржанұлының есімімен аталатын мектептің жабылып қалғанына қынжылыс білдіре келіп, аудан орталығындағы Новоишим қазақ орта мектебіне атын беру жөнінде бастама көтерді. Ұсыныс қолдау тапты.
Республикалық ғылыми- практикалық конференция Социалистік Еңбек Ерінің кіндік қаны тамған жерінде жалғасып, жұртшылық ән мен күй кешін, ұлттық спорт түрлері бойынша жарысты тамашалады. Құйрық- жалы таралып, тұяғымен жер тарпыған сәйгүліктер дүбірлі аламан бәйгеге қосылды. Білектері білеудей балуандар боз кілемде арыстандай алысып, қазақша күрестің көрігін қыздырды.
Мерейтойлық іс-шаралар Еркін Әуелбековтің тұлғасына деген құрметтің, халық бірлігінің, ұрпақтар сабақтастығы мен мәдени мұраны сақтау идеясын дәріптеудің айқын көрінісіне айналды.
Шолпан САЛЫҚОВА.
Ғабит Мүсірепов атындағы аудан.