“Азаматтарға арналған үкімет” мемлекеттік корпорациясы төтенше жағдайдан кейін жаңа жұмыс тәртібіне көшпек. Тұрғындарға қолайлы болу үшін орталық жұмысы толықтай цифрландырылмақ. Бұл жайында Мемлекеттік қызмет істері агенттігі облыстық департаментінің басшысы Елена Степаненко және “Азаматтарға арналған үкімет” мемлекеттік корпорациясы облыстық филиалының директоры Еркін Жұмабай баспасөз мәслихатында баяндады.
Өңірімізде электронды үлгіде алынған қызметтер саны төрт жыл бұрын 19,9 пайызды ғана құраса, биыл карантин кезінде бұл көрсеткіш 85,4 пайызға жетті. “Азаматтарға арналған үкімет” мемлекеттік корпорациясы облыстық филиалының директоры Еркін Жұмабайдың айтуына қарағанда, орталық қызмет түрлерінің 80 пайызын электронды үлгіге көшірген.
– Мемлекеттік қызметтерді алу кезіндегі кезекті болдырмау үшін тұрғындар көрсетілген уақытта келулері тиіс. Кешіккен жағдайда кезекке тапсырыс беру рәсімін қайталауға тура келеді. Кезекке тапсырыс беру қызмет алушының ЖСН арқылы жүзеге асырылады. Онлайн қызметтерді өз бетінше алуға қиналған азаматтар 1414 нөміріне хабарласуына болады.
Қазір барлық мемлекеттік, медициналық және білім беру ұйымдарында, сауда-ойын-сауық орталықтарында және банктерде өзіне-өзі қызмет көрсету бұрыштарын орналастыру туралы мәселе қарастырылуда, – деді Еркін Жұмабай.
Бүгінде “eGov.kz” порталында 567 қызмет, “eGov mobile” мобильді қосымшасында 64 қызмет пен сервис, “Telegram” мессенджерінде, “Facebook” және “ВКонтакте” әлеуметтік желілерінде 25 мемлекеттік қызмет түрі қолжетімді. Сонымен қатар тұрғындарға бірреттік SMS арқылы мемлекеттік қызметтің 92 түрін алуға мүмкіндік жасалды. Бұл жаңашылдықтар қалалық және автокөлікті тіркеу жөніндегі мамандандырылған бөлімнің жұмыстарына ғана қатысты. Ал аудан орталықтарындағы бөлімдер жұмысын бұрынғы үлгіде жалғастырады.
Облыстық мемлекеттік қызмет істері департаменті жергілікті мемлекеттік органдарда өзіне-өзі қызмет көрсету бұрыштарының жұмысын жандандыруда. Бұл бұрыштарды ашудың мақсаты – тұрғындарды өз бетімен мемлекеттік қызмет алуға үйрету және саланы цифрландыруда өтпелі кезең болып табылады.
Мемлекеттік қызмет істері департаментінің басшысы Елена Степаненконың айтуынша, қызметтер сапасына мониторинг жүргізіп, тұрғындармен кері байланыс орнату үшін “Digital agent” мобильді қосымшасы жасалған. Оның көмегімен азаматтар қызмет сапасын бес деңгейлі шкаламен бағалап қана қоймай, Халыққа қызмет көрсету орталықтары, мемлекеттік кірістер, еңбек және әлеуметтік қорғау органдарының жұмысын жақсарту жөнінде ұсыныстарын жаза алады.
Арайлым БЕЙСЕНБАЕВА,
“Soltústіk Qazaqstan”.