Елорданың “Барыс” хоккей клубы Құрлықтық хоккей лигасы (ҚХЛ) аясындағы кезекті тур ойынын Алматыда өткізді. Бұл жолы Челябінің “Трактор” командасын қабылдап, 2:0 есебімен жеңіске жетті.
“Алматы Арена” спорт кешеніне жиналған 12 мыңнан астам жанкүйер бұл кездесуде екі шайбаның куәсі болды. Командалар алғашқы кезеңде тең ойнағанымен, кездесудің екінші бөлігінде “Барыс” ойыншылары қарсыластың қақпасына екі бірдей жауапсыз шайба салды. Матчтың 22-ші минутында Роман Старченко мергендігімен көзге түссе, арада екі минут өткенде Ииро Пакаринен есепті еселеді. Осылайша “Барыс” кездесудің екінші бөлігінде-ақ матч тағдырын шешіп тастады.
Бұл жеңісінен кейін 10 ұпайы бар “Барыс” турнир кестесінде 6-шы орында келеді. Жерлестеріміз келесі екі ойынын сырт айдында өткізеді.