Елімізде туберкулез ауруын жұқтырғандар азаяр емес. Дегенмен дерттен сақтануға болады. Оның өзге көптеген жұқпалы аурулардан айырмашылығы – белгілері бірден пайда болмайды, көп жағдайда жасырын түрде дамиды. Бұл науқас адамның туберкулезді басқаларға жұқтыру мүмкіндігін арттырады.
Туберкулездің жұқпалы түрімен ауыратын науқас жұқпа көзі болып табылады. Олар жыл бойы орта есеппен 10-15 адамға ауру жұқтырады. Вирус жұқтырып алған адамның шамамен 8-10 пайызы ауырады.
Ауру бірден туындамайды, жұқтырғаннан ауру пайда болғанға дейін бірнеше айдан бір жылға дейінгі мерзім өтуі мүмкін. Бұл жағдайда адам ағзасының қорғаныш күші мен иммундық жүйесінің жағдайы маңызды рөл атқарады.
Ауру ауа арқылы берілуі мүмкін. Сондықтан оны кез келген жерде жұқтырып алуға болады. Бактерия көбінесе тыныс алу жолдары арқылы енеді. Науқастар түшкірген, сөйлескен, жөтелген кезде жұғады.
Туысы мен жақын таныстары туберкулезбен ауыратындар және олармен бір пәтерде тұратындар, ұзақ уақыт бойы науқастың жанында болғандар бірден тәуекел тобына енеді. Себебі олардың туберкулезді жұқтыру ықтималдығы жоғары.
Туберкулез ауруының алғашқы белгілері: екі аптадан артық жөтел, дене қызуының көтерілуі, әлсіздік, тершеңдік, тәбеттің төмендеуі, қалжырау, салмақ жоғалту, кеуденің ауруы, қан түкіру. Аурудың алғашқы белгілері пайда болған кезде тез арада дәрігерге қаралыңыз.
Ал ауырмас үшін бірқатар шараларды қатаң орындау қажет. Қолыңызды жиі-жиі сабындап жуыңыз, жыл сайын флюорографиядан өтіп тұрыңыз, ол ауруды ерте кезде айқындауға мүмкіндік береді, таза ауамен көбірек дем алыңыз, күн аясына жиі шығыңыз, тағам сіңімді және құнарлы болуы тиіс.
Темекі шегуден, есірткіден, алкогольді көп мөлшерде пайдаланудан бас тартқан жөн. Тікелей күн сәулесі туберкулез бактерияларын өлтіреді. Сондықтан көрпені, жүн және мақталы, маталы заттарды күн көзіне кептірген жөн.
Жангелді ИБРАЕВ,
Қызылжар аудандық санитарлық-эпидемиологиялык бақылау басқармасының басшысы.