Менің ата-анам – Тайынша ауданындағы Аймақ ауылының тумалары. Анам үй шаруашылығында, біздің алаңсыз білім алуымызға жағдай жасап отыр. Ал әкем жергілікті “Қазан” жауапкершілігі шектеулі серіктестігінде жұмыс істейді. Жүзден астам шаңырақ түтін түтетіп отырған елді мекенде жергілікті қазақ халқымен татулығымыз жарасып, береке-бірлікте күн кешіп отырмыз.
Інім Сергей екеуміз Аймақ негізгі мектебінде қазақ тілінде білім аламыз. Ағамыз Александр мектепті тамамдап, жоғары оқу орнына түсу үшін қалаға кетті. Ал екінші інім мектеп табалдырығын аттағалы отыр. Білім ордасында оқитын тоқсан оқушының жетеуі – өзім сияқты өзге этнос өкілінің балалары. Алғашында қазақ сыныбында оқу қиындық туғызғаны рас. Сондықтан екінші сыныпта оқитын ініме бас-көз болып, қиынсынған жерде қолымнан келгенше көмектесіп, бағыт-бағдар беріп отырдым. Сынып жетекшісі Раушан Тоқсанбаева әр тақырыпты толық түсінуі үшін жан-жақты қолдау көрсетеді. Мұғалімнің айтуынша, інімнің сабақ үлгерімі, талпынысы жақсы.
Мен әдеби шығармаларды оқығанды ұнатамын. Осының арқасында Петропавл қаласында өткен “Жарқын болашақ” олимпиадасының облыстық кезеңіне қатысып, бағымды сынадым. Қазақтың ұлы ақыны Мағжан Жұмабаевтың өлеңдерін жатқа оқып, екінші орын алғанда, қуанышымда шек болмады. Мұны Қазақстанда өзге этнос өкілдерінің еркін білім алып, өзінің мүмкіндігін көрсету үшін барлық жағдай қарастырылғанының бір айғағы деп білемін.
Отбасымызда да бір-бірімізбен қазақ тілінде сөйлесеміз. Өйткені, қазақтарды қиналған жанға қамқорлығын аямайтын, жасаған жақсылығын бұлдамайтын, құшағына алған қанша жұрт алғыс білдіріп жатса да, масаттанбайтын халық ретінде таныдық. Ел бойынша жыл сайын наурыз айының алғашқы күні оларға алғыс айтуымыздың себебі де осы. Бір шаңырақтың астында, біртұтас ұлт ретінде қазақтың еліне, жеріне, тіліне құрмет білдіре жүріп, Ұлы дала елінің дамуына үлес қосу – әрбіріміздің міндетіміз. Бірлігіміз бен татулығымыз берік болсын деп тілеймін!
Расул АЛСЕРОВ,
Аймақ негізгі мектебінің оқушысы.
Суретті түсірген Талғат ТӘНІБАЕВ.