Жақында қолыма жазушы Мырзатай Жолдасбековтің “Кісілік кітабы” еңбегі тиді. Демде оқып шықтым. “Қазақ қайтсе қалады қазақ болып?” деген сұраққа жауап іздеген автордың бұл кітабына мемлекеттік мүдде, адамгершілік, кісілік турасында жазған мақалалары мен сөйлеген сөздері енгізіліпті. Әсіресе маған түзу жолдан жаңылысқан жастарды тезге салу мәселесін көтерген мақаласы ұнады.
Ел ағасы қара басының қамын ойлаған жігіттерді қатты сөгеді. “Көрмейтін соқыр, сезбейтін мылқау емеспіз, бәрін де көзімізбен көріп, көкірегімізбен сезіп отырмыз. Бесіктен белі шықпай жатып, халықтың қадіріне жетпей жатып дүние жиып, билікке жармасу етек алды. Билік басына жігіттің бағы асып келсе, қанеки, өкініші, жең ұшынан жалғасып, сыбайласып, тіпті адасып келгендер көбейіп барады. Жастар арасында ұлттық рухтан, ұлттық қасиеттен айырылған отансыздардың көбейіп бара жатқаны да бәрімізді қатты алаңдатады. Ұлтын ұлықтай алмағандардан, ұлттық сезімі, ұлттық намысы жоқтардан не үміт күтуге болады?” – дейді ол. Сөйтіп, ел болып, жұрт болып жастарды өзгеге емес, өнегеге; тәлпіштікке емес, тәрбиелілікке; көргенсіздікке емес, көрегенділікке; әдепсіздікке емес, әдептілікке; қатыгездікке емес, мейірімділікке; тексіздікке емес, тектілікке; опасыздыққа емес, отаншылдыққа баулу керектігін алға тартады.
“Ұлттығыңды ұлықтау, ата-ананы ардақтау, үлкенді сыйлау, кішіні құрметтеу, қызға қырық үйден тыю – қазақ арасында қайта қалыптасып, бұлжымас заңға айналса болар еді. Жаманнан жирену, жақсыдан үйрену, әдептен озбау, өткенді игеру, ата салтын бойға сіңіру – ендігі жөн-жосығымыз осы болу керек; ұлын – айбар, қызын – әдеп тұтқан ел-жұртпыз, ұлдарымыз бен қыздарымыз сан ғасырлар қалыптасқан салт-дәстүрдің, әдет-ғұрыптың, жөн-жосықтың озығына ден қойып, шын пейілмен, ықыласпен бет бұрса болар еді”, – дейді автор.
Расымен де, қазір адамгершілік қасиеттерден жұрдай жастар жаға ұстатарлық қылықтарды шығарып жүр. Орысша шүлдірлеп, ашық-шашық киінген қыздар, балағат сөздерді ұялмай айтып, көшеде шырт-шырт түкірген ұлдарды жиі кезіктіретін болдық. Демек олардың бойына отансүйгіштік қасиеттің дарымағаны ғой?! Бұл ретте Мырзатай Жолдасбекұлы: “Біз жас ұрпақтың ана тіліне, туған жеріне, бабалардан қалған асыл мұраларға деген сүйіспеншілігін туғызу арқылы ғана отаншылдық сезімін оята аламыз”, – дейді. Идеологиямыздың басым бағыттарының бірі осы болса керек.
Тамерлан ЕЛУБАЙ,
М.Қозыбаев атындағы СҚУ-дің студенті.