“Жақсы Тұз Петропавл” жауапкершілігі шектеулі серіктестігінің бас директоры Ерік Әзенов бірнеше жылдан бері тиісті мекемелердің табалдырығын тоздырып, әуре-сарсаңға түскен еді. Кәсіпкерге 2016 жылдың сәуір айында Уәлиханов ауданындағы Теке көлінің маңындағы ас тұзын 25 жылға дейін өндіруге мүмкіндік беретін келісімшарт берілген. Бірақ осы күнге дейін жер телімін пайдалану құқығына қол жеткізе алмай келеді.
“Бизнесті және инвестицияны қорғау” жобалық кеңсенің отырысында бұл мәселе тиісті мемлекеттік органдардың, прокуратура, экономикалық тергеу қызметі, облыстық кәсіпкерлер палатасы өкілдерінің қатысуымен қайта қаралып, сұралып отырған жер телімінің шекарасы өзгертіліп, облыстық әкімдікке екінші мәрте өтініш жіберілді. Нәтижесінде үстіміздегі жылдың 14 қазанында өткен жер комиссиясының отырысында оң шешім шығарылды.
– Жобалық кеңсенің сыбайлас жемқорлыққа қарсы күрес жөніндегі қызметкерлері кәсіпкерлермен бірге бизнесті іске қосудың барлық кезеңдерінен өтеді. Яғни, рұқсат құжаттарды алудан бастап, кәсіпорынды іске қосу және оның тұрақты жұмыс істеуі де бақылауда болады, – дейді Сыбайлас жемқорлыққа қарсы іс-қимыл агенттігінің облыстық департаменті басшысының бірінші орынбасары Нұрлан Жахин.
Өңірімізде 16 жергілікті және шетелдік кәсіпкерлермен 143,5 млрд. теңгенің келісіміне қол қойылған. Бүгінгі күні жобалық кеңсеге келіп, түйінді мәселесін айтатын кәсіпкерлердің де қатары көбейген. Бір жылдың ішінде өңір кәсіпкерлерінен 54 өтініш түсті.
Жан АЙТМАҒАНБЕТОВ,
Сыбайлас жемқорлыққа қарсы
іс-қимыл агенттігі облыстық
департаментінің баспасөз хатшысы.