Біз өткен тарихымыздағы кейбір ақтаңдақтарды ешқашан естен шығармауымыз керек. Елбасы Жарлығымен 1998 жыл – “Халық бiрлiгi мен ұлттық тарих жылы”, 1999 жыл “Ұрпақтар бірлігі мен сабақтастығының жылы” деп жарияланып, көптеген мұрамыз түгенделіп, жоғымыз табылды. Өткен жылы Елбасының бастамасымен “Халық тарих толқынында” айдарымен тарихшы ғалымдардың біраз еңбектері ел назарына ұсынылды. Бірақ осы қадамдар біздің тұтас тарихымызды толығымен түгендеп бере алған жоқ. Ал биылғы жыл ұрпақ жадында сақталған салиқалы ойдың қайта жаңғырар тұсы болатын сияқты. Себебі, Елбасы биылғы Жолдауында 2015 жылы Қазақ хандығының 550 жылдығы кең ауқымда тойланатынын тайға таңба басқандай қылып айтты. Содан бері төл тарихымыздың беймәлім болып келген тұстары өскелең ұрпақтың назарына ұсынылып, бұл олардың елжандылығы мен отансүйгіштігін дамытуға бағытталды. Ал Астана төрінде өтіп жатқан Қазақ хандығының 550 жылдығына арналған салтанатты шараның әдебиетіміз бен мәдениетіміз үшін өзіндік орны бар. Елбасы алқалы жиында: “Тек өткен тарихымен ғана мақтанатын елдің болашағы бұлыңғыр. Әр буын өкілдері ата-баба даңқына даңқ қосып, абыройын арттырып, бүкіл дүниежүзі алдында беделін биіктете білген елдің ғана болашағы жарқын”, – деді. Көңілге қонатын даналық сөздер.
Сахара сұлтандары Керей, Жәнібек, одан Абылай сынды ақиыққа, Кенесарыға дейінгі көктүрік қанынан ұйыған батырлықтың желісі үзілмей бүгінгімен сабақтасты. Батыр бабаларымыз ұлан-ғайыр жерді шашау шығармай, бүгінгі ұрпаққа аманаттады. Бұл – ешқашан ұмытылмайтын ерлік. Сондықтан Қазақ хандығының 550 жылдығына тәу етудің еш артықтығы жоқ.
Ғалия БЕКТАСОВА,
Қызылжар аудандық
мұрағатының директоры.