“Азаматтарға арналған үкімет” мемлекеттік корпорациясының 1411 байланыс орталығы енді тәулік бойы келіп түскен телефон қоңырауларына жауап беретін болады. Әлеуметтік төлемдер мен еңбек саласына қатысты кеңес беретін call-орталық қызметкерлері бұдан былай атаулы әлеуметтік көмек пен әлеуметтік қызметтер порталының жұмысына қатысты сауалдарға, сондай-ақ, info@info.mintrud.kz электронды поштасына келіп түсетін хаттарға да жауап береді.
– Бүгіндері 1411 байланыс орталығына еліміз бойынша күн сайын орташа есеппен бес мың рет телефон соғылады. Азаматтар демалыс және мереке күндері де қоңырау шалып, өз сауалдарына жауап ала алады. 2020 жылдың басынан бері республиканың әр түкпірінен 22 мың рет телефон соғылды, олардың басым бөлігі зейнетақы және әлеуметтік қамсыздандыруға, көпбалалы аналардың ай сайынғы жәрдемақысына, атаулы әлеуметтік көмек мәселелеріне қатысты болды. Қызмет алушылар халыққа қызмет көрсету орталығына бармас бұрын, 1411-ге хабарласып, әлеуметтік қызметтерді рәсімдеуге қажет құжаттар тізімін де алдын ала біле алады, – дейді “Азаматтарға арналған үкімет” мемлекеттік корпорациясы басқарма төрайымының орынбасары Біржан Жүнісов.
1411 бірыңғай қысқа нөміріне тегін қоңырау шала отырып, кез келген оператордан мынадай мәселелерге қатысты жауап алуға болады:
– зейнетақы мен жәрдемақыны рәсімдеу;
– көпбалалы отбасының мемлекеттік жәрдемақысы;
– атаулы әлеуметтік көмек;
– әлеуметтік қызметтер порталы;
– еңбек қатынастары және халықты жұмыспен қамту;
– мүгедек балаларды тәрбиелеп отырған адамдарға онлайн-психологиялық консультация беруге өтінімдер қабылдау.
Бұдан басқа, әлеуметтік төлемдер мен зейнетақы және еңбекпен қамту мәселесіне қатысты негізгі сауалдардың жауабын www.info.mintrud.kz сайты арқылы да білуге болады.
Ерназар НҰРҒАЛИЕВ,
“Азаматтарға арналған үкімет”
мемлекеттік корпорациясы” коммерциялық емес акционерлік қоғамының пиар-менеджері.