3 ақпанда Тайынша аудандық «Тайынша таңы» газетінің оқырман қолына тигеніне 20 жыл толады. Осы уақыт аралығында жергілікті басылым тайыншалықтардың өмір айнасына айнала білді.
Қазақстан егемендігін алып, тәуелсіз мемлекетке айналған, бірақ әлеуметтік-экономикалық түйткілдер әлі де аз кездеспейтін кезеңде газет тілшілері қиындықтарға өздерінің қуатты қаламын қарсы қоя білді, ел ырысын молайту жолындағы ерен еңбектің, қажырлы қимылдың белсенді насихатшысы болды. Осылайша ауданымыздың қайта түлеп, жаңғырып, жаңаруына өлшеусіз үлестерін қоса білді. Уақыт талабымен үндескен, айтар ойы салмақты мақалалар жүйелі түрде жарияланып, басылымның өзіндік дәстүрі берік орнықты, газет тарихының жарқын беттерінде жазылып қалды.
Басылым өзінің сара жолынан, ұстанған бағытынан тайған жоқ. Тәуелсіздік аясында өркендеген облысымыздың іргелі ауданы – Тайыншаның берекелі қазынасы мен құндылықтарын оқырман қауымға жеткізіп, талмай таныстырып келеді.
Мен газеттің тұңғыш редакторы ретінде 1000-шы санын оқырманға ұсынып отырғанымды ең бақытты сәтіме балаймын. Газетімізде Президент алға қойған міндеттер мен тапсырмалар, сондай-ақ ауданның әлеуметтік-экономикалық даму деңгейін көтеру бағытындағы іргелі ізденістер, жеткен жетістіктер, бағалы бастамалар, озық инновациялық бағдарламалар мен жобалар, бұдан бөлек, мемлекеттік тіл, ұлттық құндылықтар, тағы басқа мәселелер кеңінен қамтылуда. Басылымның мазмұнды шығып, уақытылы тарауына игі көмегін беріп отырған аудан әкімі Берік Әлжановқа, мекеме, шаруашылық басшыларына, кәсіпкерлерге, бюджеттік сала жетекшілері мен қызметкерлеріне алғысымыз шексіз.
Заманауи технологиялар қарыштап дамыған және де жасанды интеллект пен ғаламтор үстемдік құрған қазіргі заманда журналистерге қояр талап та, талғам да жоғары. Осы себепті қоғамдағы өзекті мәселелерді барынша жіті зерттеп, зерделеумен қатар ақпарат таратудағы жеделдік, ұшқырлық мамандыққа деген адалдықпен, сергектікпен, ізденіспен тығыз байланысты екенін жақсы түсінеміз. Осы үдерістер үдесінен көрінуге бар күш-жігерімізді жұмсап келеміз.
Адам жанын жадырататын игі істермен қатар проблемалық тақырыптар да аз емес. Солардың қиюын келістіріп, санаға сіңіріп, жүрекке ұялата білу әр тілшіден асқан жауапкершілікті қажет ететіні сөзсіз. Бұл орайда көпшілікті толғандыратын мәселелелерді, өтініш-тілектерді әрқилы мәнерде бере білудің мәні айрықша. Аудан, округ әкімдерінің тұрғындар алдындағы есепті кездесулерінде көтерілген проблемалық жайттардың қалай шешім табатыны, былайша айтқанда, түпкі нәтиже анағұрлым маңыздырақ. Халық үніне құлақ асып, күрмеуі қиын күрделі мәселелерді көтеріп жүрген мәслихат депутаттарының, жұмыс істеу тәжірибелері, жұмыспен қамту бағдарламалары, жаңашылдықтар, әлеуметтік төлемдегі өзгерістер, мемлекеттік қызмет көрсету, жастар бастамалары төңірегінде айтар ойымыз, ақпараттық-танымдық материалдар түгесілмейді.
Алдағы іс-қимыл жоспарымыз ауқымды. Жаңа айдарлар мен арнайы беттер ашып, танымдық мақалаларды үзбей жариялауды көздеп отырмыз. Мемлекеттік тапсырыс беру мөлшері көбейтілсе, газет тиражы да, сапасы да артары анық. Тәрбиелік жағынан мағыналы мақалаларға еңбек адамы, қазақтың салт-дәстүрлері, өлкетану шежірелері арқау етілмек.
Журналистика – қызығы мен қиындығы қатар жүретін, асқан жауапкершілік пен кәсіби шеберлікті, білімділікті, ізденісті қажет ететін сала. Жекелеген адамдардың тағдыры арқылы да қоғамдық болмысқа баға беріліп жатады. Қалам тербеген кез келген тақырып шынайы суреттелсе ғана діттеген межеге жеткенің.
Гүл НҰРАЛИНА,
«Тайынша таңы» аудандық
газетінің редакторы, «Ақпарат
саласының үздігі» төсбелгісінің иегері.
Тайынша ауданы