Қазақстанның бірқатар бұқаралық ақпарат құралдары басшылары 2016 жылдың 20 наурызында өтетін Қазақстан Республикасы Парламенті Мәжілісінің кезектен тыс және мәслихат депутаттарының кезекті сайлауы науқанын ақпараттандыру барысында этикалық нормаларды сақтау туралы Хартияға қол қойды.
Аталған Хартия Қазақстан Республикасы Конституциясына, ҚР “Сайлау туралы” және “Бұқаралық ақпарат құралдары туралы” Заңдарына сәйкес жасалған.
Хартияның негізгі мақсаты қазақстандықтарды сайлау науқаны, сонымен бірге Қазақстан Республикасы Парламенті Мәжілісі мен мәслихаттарының депутаттығына кандидаттардың қызметтері туралы БАҚ-та шынайы әділ, толық және сенімді ақпараттармен қамтамасыз ету болып табылады.
Сонымен бірге, Хартияда БАҚ Парламент Мәжілісі мен мәслихат депутаттығына тіркелген барлық кандидаттардың, олардың саяси көзқарастарына қарамастан, өздеріне теңдей мүмкіндікке ие болуына ықпал ете алатыны және солай етуге тиісті екені жазылған.
“ҚазАқпарат”.