Нұр-Сұлтан қаласындағы «Қазанат» ипподромында ұлттық ат спорты түрлерінен «Елбасы кубогі» республикалық турнирі өтті. Жалпы жүлде қоры 20 млн. теңгені құраған жарыста еліміздің әр өңірінен 100-ге жуық шабандоз бақ сынады.
Жарыс бағдарламасына сәйкес қатысушылар 9 шақырымдық құнан бәйге, 7 шақырымдық жорға жарыс, 16 шақырымдық кіші аламан және 25 шақырымдық аламан бәйге бойынша сынға түсті. Аталмыш додада солтүстікқазақстандық шабандоздар өңір намысын қорғап, үздіктер қатарынан көріне білді. Атап айтқанда, жорға жарысында Қызылжар ауданының шабандозы Евгений Чибисовтың «Филипс» атты сәйгүлігі шашасына шаң жұқтырмай, мәре сызығын бірінші болып кесті. Ал «Реваншты» тізгіндеген Ирина Варапаева екінші орынға ие болды.
Жарыс қорытындысына сәйкес жерлестеріміз кубоктармен және медальдармен марапатталды. Сондай-ақ, шабандоздарға 500 және 300 мың теңгенің сертификаттары табысталды.
Қанат АТАМАНОВ,
«Soltústik Qazaqstan».