Сағат таңғы жеті. Мен Солтүстік Қазақстан облысы, Жамбыл ауданы, Пресновка ауылында Ресей Федерациясы шекарасынан 12 шақырым жерде орналасқан «Жамбыл» шекара заставасында тұрмын. Қасымдағы серігім – шекара заставасының бастығы, капитан Азамат Маженов 1992 жылы 20 сәуірде Түркістан облысы, Леңгір қаласында дүниеге келген. 10 жылдық тәжірибесі бар шекарашы мені бөлімше аумағымен жүргізіп, заставаның тарихы туралы әңгімелеп берді. Оның айтуынша, бұл застава шекарашылардың қолымен тұрғызылған. Құрылыстың негізгі кезеңі 2002- 2005 жылдары сол кездегі лейтенант Алмаз Шаяхметов және аға лейтенант Мақсат Тұрысбеков басқарған кезде қаланған.
Жеке құрамның күнделікті өмірі шекараны патрульдеуден шектелмейді, сонымен қатар шекара белдеуіндегі жергілікті тұрғындардың құжаттарын тексеру, шекараны заңсыз кесіп өту әрекеттерінің жолын кесу, контрабандаға қарсы күрестен тұрады. Заставадағы заманауи жабдықтар – термокамералар, түнгі көру құралдары, дрон, трактор, 4 автомобиль шекарашылардың алдыға қойған тапсырмаларды бұлжытпай орындауына көмектеседі, дегенмен бұл жерде ең бастысы – әрбір шекарашының қырағылығы мен кәсібилігі.
Заставаның аумағынан өтіп, шекара бөлімшесі орналасқан Пресновка ауылына бет бұрдық. Әңгімелесіп келе жатып жазушы Иван Петрович Шуховтың әдеби-мемориалдық мұражай үйіне қалай жақындағанымызды байқамай қалдым. «Простор» республикалық әдеби-көркем журналын басқарған белгілі жазушы И.П. Шухов өмірінің соңғы жылдарында Қазақ КСР Мемлекеттік сыйлығына ие болған «Преснов хикаялары» атты көп жанрлы шығармалар жинағын жазған.
Жамбыл ауданы жалғыз Иван Шуховпен ғана танымал емес. Благовещенка ауылының маңындағы Гүлтөбе деген жерде Тәуке ханның серігі, 25 жасынан бастап хан әскерінің бас қолбасшысы болған Қожаберген жырау дүниеге келген. Қожабергеннің әйгілі туындысы – «Елім-ай» дастаны халық есінде сақталған. Көрнекті қазақ жазушысы, мемлекет және қоғам қайраткері, Қазақстан Ғылым академиясының академигі Ғабит Мүсірепов те Жамбыл ауданы Жаңажол ауылында дүниеге келген.
Осындай атақты адамдарды дүниеге әкелген Жамбыл ауданының тұрғындары шекара бөлімшесінің әскери қызметшілеріне көмекке келуге әрқашан дайын. Олай дейтінім, жергілікті тұрғындар арасынан 7 адам ерікті жасақтың құрамына кіреді.
«Жамбыл» шекара бөлімшесінің бастығына жеке құрамды тәрбиелеуге лейтенант Бақытбек Асылбекұлы көмектеседі. 2024 жылдың қараша айында оның ұйымдастыруымен Пресновка ауылындағы мектеп оқушылары арасында «Шекарашының жас досы» клубының мүшелерінің қатысуымен ауқымды іс-шара өткізілді.
Застава – бұл жай ғана бетон мен ағаштан жасалған құрылымдар емес, бұл өз ережесі бар және Отанға қызмет етудің қиын, бірақ маңызды жолын таңдаған адамдардан құралған шағын, өзін-өзі қамтамасыз ететін әлем. Бұл жерде бос жүріске, жалқаулыққа орын жоқ. Әрбір шекарашы өз міндетін жақсы біледі және оны жауапкершілікпен орындайды. Жұмыс бір сарынды, ауыр болса да, ел шекарасындағы қауіпсіздікті қамтамасыз ету үшін аса қажет.
Динара УТЕБАЕВА,
Ұлттық қауіпсіздік комитеті Солтүстік Қазақстан облысы бойынша шекара қызметі департаментінің баспасөз хатшысы.