Адам баласы үшін саналы ғұмырының қай кезеңі болмасын елеулі. Десек те жеті асу белестің орны бөлек. Неге десеңіз, 70 жас – ақыл-ойдың, сана-сезімнің әбден толығып, кемеліне келетін, өткен өмірін ой елегінен өткізіп, таразылайтын, ел алдында есеп беретін кезі.
Осы тұрғыдан сөз сабақтайтын болсақ, өзіміз сүйіп оқитын, тұрақты оқырманы саналатын аудандық «Есіл өңірі» газеті арқылы киелі өңірімізге лайықты еңбегін сіңіріп, көпшіліктің құрметі мен сүйіспеншілігіне бөленіп жүрген жергілікті журналистер алдымен еске оралады. Солардың бірі, бірегейі – жиырма жылға жуық аудан шамшырағының бас редакторы қызметін абыроймен атқарған Шолпан Салықова. Қалам ұстаған ат төбеліндей тілшілер қауымы ішінен темірқазық жұлдызындай жарқырай көрініп, көптің көкейінде жүрген ойды тап басып айта білуімен ерекшеленген, мамандығына деген адалдығына кір жуытпай, кіршіксіз сақтай білген қарындасымыздың қоғамдағы орны адамға жасаған жақсылығымен, еліне сіңірген еңбегімен бағалануы айрықша қуантады. Аудан активінің үлкен жиынында мерейтой иесінің атына жылы лебіздер арналып, облыс әкімінің Құрмет грамотасының салтанатты жағдайда табысталуы – осы сөзіміздің нақты айғағы.
Өткен ғасырдың 90-шы жылдары «Голос целинника» газетінің табалдырығын аттап, қазақ тілін үйрету курсын ашты, мемлекеттік тіліміздің өз мәртебесін алуына өзіндік үлесін қосты. Кейін жазуға деген қарым-қабілеті бағаланып, тілшілік қызметке қабылданды. 2005 жылы «Есіл өңірі» газеті ашылып, бас редакторы болып тағайындалды. Осылайша әріптестерімен бірге ортақ іске жұмыла жүріп, басылымның қалыптасуына, өз орнын табуына айшықты қолтаңбасын қалдыра білді. Саналы ғұмырын мазасыз тірлігі бастан асатын журналистика саласына бағыттап, ауылдық жерлердегі оқырмандармен тұрақты қарым-қатынас орнатты. Олардың әлеуметтік-тұрмыстық өміріне қатысты мәселелер газет бетінде жиі көтеріліп, шешімін табуына қал-қадірінше қолдау көрсетілді. Шолпан қарындасымыздың әр мақаласынан қаламгерге тән парасаттылығы, салиқалығы, ізденгіштігі, еңбекқорлығы тектіліктің кәусар бұлағындай айқын байқалып тұрады. Қажырлы да нәтижелі еңбегінің арқасында аудан жұртшылығының құрметі мен сүйіспеншілігіне бөленді. Кәсіби журналист ретінде қалыптасып, күрделі тақырыптарды қарапайым тілмен кестелей білу, әсерлі жеткізу – оған тән қасиеттердің бірі. Жеткен жетістіктерін санамалайтын болсақ, айшықты асуларының бірі – республикалық байқауда жеңімпаз, бұдан бөлек, ауданның құрметті азаматы атануы дер едім.
Жүзінен де, көзінен де мейірім шуағы төгіліп тұратын асыл жанның адами қасиеттерін түгендеу шарт емес, алайда өмірге деген құштарлығы, бойынан асып төгілген рухани күш-қайраты қайран қалдырады. Кіші ұлы үш жасқа толғанда балалары асқар тау әкеден, өзі сүйікті жарынан, арқасүйерінен айрылып, 38 жасында 4 ұл-қызымен қайғы жұтып қалған болатын. Содан бері қаншама қиындықпен бетпе-бет келсе де, тағдырдың талай қыспағына төтеп беріп, жеңе білді. Отбасын жүрек жылуына бөлеп, өмірден өз орындарын табуына, шетелде оқуларына да жан-жақты қолдау білдіріп отырды.
Бүгінде ол екі немере мен бес жиеннің бал тілін қызықтап отырған бақытты әже, редакцияның, ауданның мақтанышы. Әлі қатардан қалған жоқ, тілшілік қызметін сәтті жалғастырып келеді.
Батырбек СМАҒҰЛОВ,
Қазақстанның құрметті журналисі.
Ғабит Мүсірепов атындағы аудан.