“Еңбек” бағдарламасының бір тармағы – халық тығыз орналасқан өңірлердегі жұмысқа қабілетті отбасыларды маман тапшы облыстарға көшіру. Әр облыс осы бағдарлама негізінде жасалған өз жоспарын жүзеге асыруда. Жүйелі жұмыстардың нәтижесінде Қызылжар өңіріне көшіп келушілердің саны күн санап артуда.
Биыл оңтүстіктен солтүстікке бағыт алғандардың ішінде ерлі-зайыпты Нұркелді Мінтайұлы мен Сәден Тегірқызының шаңырағы да бар. Булаево қаласына қоныс тепкен бұл отбасы мемлекеттік көші-қон бағдарламасына дән риза. Олар 2019 жылдың күзінде Қытай Халық Республикасынан тарихи Отаны – Қазақстанға оралған екен. Қандастарымыз алдымен Алматы облысындағы Екпінді ауылына көшіп бармақ болған. Бұл әулет бұрыннан бері мал шаруашылығымен айналысады. Шекараның арғы жағында да атакәсіпті нәсіп етіпті. Сондықтан шөбі шүйгін, жайылымы кең жер іздеген.
– Бізге дейін Қазақстанға көшіп келген ағайын-туыстарымыз табиғаты әсем, жері құнарлы, шөбі шүйгін әрі мал шаруашылығымен айналысуға ең қолайлы өңір – Солтүстік Қазақстан облысына көшуге кеңес берді. Мен былтырғы жылдың қараша айында Мағжан Жұмабаев ауданының орталығы – Булаево қаласына келіп, бұл жақтағы жағдайды өз көзіммен көріп кеттім. Шынында да, табиғаты тамаша, ауа райы біздің тұрған аймаққа ұқсас екен. Содан осында көшіп келуге бел будым, – дейді отағасы.
Биылғы наурыз айында Булаевоға қоныс аударған отбасы салынып жатқан көп тұрғын үйлердің біріне орналасты. 1989 жылы шаңырақ көтерген Нұркелді Мінтайұлы мен Сәден Тегірқызы екі ұл мен бір қыз тәрбиелеп өсірген. Тұңғыштары Бектұрған Қытайда қалған ата-әжесінің қолында тәрбиеленуде. Қауіпті індеттің беті қайтқаннан кейін олар да Қазақстанға оралуды көздеп отыр екен. Спортқа жақын ортаншы ұлы Аманның облыстық спортқа дарынды балаларға мамандандырылған мектеп-интернат-колледжге оқуға түсіп, дене шынықтыру пәнінің мұғалімі мамандығын меңгермек ойы бар. Ал үйдің кенжесі Жадыра – мектеп оқушысы. Ата-анасы оның құжаттарын №4 Булаев орта мектебіне тапсырған.
– Таңмен таласа тұру – мен үшін жастайымнан қалыптасқан үйреншікті әдет. Қол қусырып отыру деген маған мүлдем жат. Көшіп келе бірден аудандық жұмыспен қамту орталығының көмегіне жүгіндім. Мал бағу туралы ұсыныс түскенде зайыбым екеуіміз қуана келістік. Өйткені, төрт түліктің пайдасын біздің халқымыздан артық білген де, бағалаған да ешкім жоқ болар, сірә. Ата-бабаларымыз төрт түлікті ырысы мен берекесі, дәулеті мен байлығы деп тани отырып, мал өсіруді негізгі кәсібі ете білді ғой. Біз осы дәстүрді жалғастыруымыз керек, – дейді Нұркелді Мінтайұлы.
Қоныс аударған кезде төленетін жәрдемақыға мал баққаннан түсетін табысты қосқан олар үш жылқы сатып алған болатын. Қазір екі бие байлап, саумал мен қымыз сатып отыр. Үйінің жанына қора-қопсыны да салып үлгерген. Әзірге Қазақстан Республикасы азаматтығын алған жоқ, сол ғана мемлекеттік грант немесе мал шаруашылығын дамытуға арналған “Сыбаға” және “Құлан” бағдарламаларының игілігін көруге қолбайлау болып тұр. Бұл, әрине, алдағы уақытта шешілетін мәселе.
Еңбекқор отбасы ешбір кедергіге қарамастан алдына қойған мақсатқа жету үшін бір адамдай тер төгуде. “Әке көрген оқ жонар, шеше көрген тон пішер” демекші, отағасына мал бағуға ұлы Аман көмектессе, отанасы қызы Жадырамен бірге бие сауып, ұлттық нақыштағы ою-өрнекпен көмкерілген көрпе-жастық тігіп, үй шаруасымен айналысады. Бұл үйдің мүшелері ортақ мақсат үшін жұмылған. “Еңбек түбі – береке” деген, сірә, осы шығар!
Мағжан Жұмабаев ауданында 2019 жылы 36 бірпәтерлі үй салынған болатын. Сол жылы көшіп келген отбасылардың ішінен еңбекке қабілетті адамдардың 48-і білім беру, ауыл шаруашылығы, денсаулық сақтау, мәдениет, құрылыс және қызмет көрсету салаларына жұмысқа орналасса, жетеуі өз кәсібін ашқан. Ал биылғы жылдың соңына дейін тағы 57 баспана пайдалануға берілмек. Шілдеге дейін ауданға 42 отбасы қоныс аударды. Табиғаты сұлы Мағжан Жұмабаев ауданына тағы 22 шаңырақ көшіп келуге ниет білдіріп отыр екен. Биыл келген еңбекке жарамды 51 адамның 17-і жұмыспен қамтылды. Сондай-ақ, 18 азамат өз кәсібін ашу мақсатында мемлекеттік грант алу үшін құжаттарын тапсырған. Қоныс аударушыларды жұмысқа орналастыру әлі де жалғастырылуда.
Еркебұлан ЕЛУБАЕВ.
Мағжан Жұмабаев ауданы.