Қазақстандық жүзгіш, Азия чемпионы Виталий Худяков Қырғызстандағы ең үлкен су айдыны – Ыстықкөлді бір шетінен екінші шетіне дейін жүзіп өтті.
Ақтөбе облысының дене шынықтыру және спорт басқармасының мәліметінше, спортшы жүзуді 5 тамыз күні таңғы сағат 5.15-те Чолпон-Атада бастаған. Су температурасы 18-19 градус жылы болған. Отандасымыз 56 шақырымды 13 сағат 18 минутта жүзіп өтіп, Каджи-Сай жағажайына жеткен.
Бұл рекордтық көрсеткіш болып табылады. Спортшы бұл рекордын биыл өтпей қалған Токиодағы Олимпиада ойындарына арнады. Себебі, дәл 5 тамыз күні жоспар бойынша төртжылдық додада ашық суда жүзуден жарыс басталуы тиіс болатын.
Еске салайық, Виталий Худяков ашық суда жүзуден Азия чемпионатының төрт дүркін жеңімпазы әрі 2021 жылы өтуі тиіс Токио Олимпиадасы жолдамасының иегері.