«Qyzyljar» арнайы экономикалық аймағы кеңейтіліп, бесінші субаймақ пайда болды. Облыс әкімдігінің кәсіпкерлік және индустриялық-инновациялық даму басқармасының мәліметінше, жаңа субаймақ 10 маусым күні Үкіметтің қаулысымен құрылды. Осылайша «Qyzyljar» арнайы экономикалық аймағы қосымша 24,5 гектар аумаққа ұлғайып, 236,8 гектарға жетті.
Жаңа құрылған бесінші субаймақта халықаралық деңгейдегі ірі инвестициялық жоба жүзеге асады. «Ultradecor Trading Kazakhstan» ЖШС компаниясы жаңа өндіріс ашуға ниетті. Оның негізін қалаушы – катарлық Causa Holding компаниясы. Бұл холдингтің бүгінде әлемнің әртүрлі елдерінде 29 зауыты бар және ағаш өңдеу саласында әлемдік көшбасшылардың бірі.
– Петропавлда ашылатын кәсіпорын құрылысқа қажет ДСП және ЛДСП өндірісімен айналысады. Осы мақсатқа 90 млрд. теңге инвестиция құйылмақ. Нәтижесінде 500 тұрақты жұмыс орны ашылады. Қазіргі уақытта бұл компанияны «Qyzyljar» арнайы экономикалық аймағының қатысушысы ретінде тіркеу үдерісі жүріп жатыр.
Өңір үшін мұндай жобаның іске қосылғаны тиімді. Жаңа жұмыс орындары ашылады, бюджетке салық түседі, жоғары технологиялы өндіріс дамиды, шетелдік инвесторлардың сенімі артады, – дейді облыстық кәсіпкерлік және индустриялық-инновациялық даму басқармасының басшысы Дархан Әмрин.
Арнайы экономикалық аймақ қатысушыларына салықтық және кедендік жеңілдіктер ұсынылады. Бұл өз кезегінде инвесторлар үшін Қазақстанда бизнес жүргізудің тиімділігін арттырады.
2019 жылдан бері жұмыс істеп келе жатқан «Qyzyljar» арнайы экономикалық аймағында бүгінде 21 компания орналасқан. Жалпы инвестиция көлемі –315,9 млрд. теңге. Нәтижесінде шамамен 4 мың жаңа жұмыс орны ашылды.
Олардың ішінде трансформаторлар шығаратын Петропавл электротехникалық зауыты, CLAAS және Sampo ауыл шаруашылығы техникасын құрастыратын СТ Эсэмбли және Казтехмаш, тіркемелі ауыл шаруашылығы техникасын құрастыратын Reimann, ламинадталған фанера өндірісін жолға қойған Nord Panels сияқты кәсіпорындар бар.
Бұл өндіріс орындары өз өнімдерін Қазақстанның өзге аймақтарына және шет елдерге жөнелтіп жатыр.
Ақерке ДӘУРЕНБЕКҚЫЗЫ,
«Soltüstık Qazaqstan».