Қазақстан Конституциясы күні мерекесі қарсаңында Қызылжар ауданында “Жастар – 2019” саяси лагері өз жұмысын бастады. Үш күнге созылатын шара барысында тренинг, шеберлік сағаты, экскурсия ұйымдастырылады.
Әр ауданнан жиналған белсенді жастар бір-бірімен тіл табысып қана қоймай, ерекше инновациялық жоба әзірлеуі тиіс. Сонымен қатар көпшіліктің алдында сөйлей білу әдебін де үйренеді. Шалақындық Екатерина Миллер аталған шараға өзінің қабілет-қарымын жетілдіру үшін келіпті. Алдағы уақытта жастар арасында шығармашылық байқау өткізуді жоспарлап жүрген ол ұйымдастырушылыққа үйренуді көздеп отыр.
Әр салада еңбек етіп жүрген елуге жуық жастың басы қосылған шара барысында жаттықтырушылар жастардың жоспарларын жүзеге асыруға көмектесуде.
– Жастарға жобаны қалай әзірлеу керектігін және оны дұрыс ұсынуды үйретіп жатырмыз. Сәтті қорғалған жобалар жыл аясына дейін жүзеге асырылмақ, – дейді ”Жас Отан” жастар қанаты облыстық филиалының жетекшісі Абылайхан Қайроллаев.
Алена ХАН.