Астанада Мемлекет басшысы Қасым-Жомарт Тоқаевтың қатысуымен ауыл шаруашылығы қызметкерлерінің екінші форумы өтіп, жиында агроөнеркәсіптік кешенінің дамуы мәселелері талқыланды, сонымен қатар салаға елеулі үлес қосқан бірқатар азаматтар марапатталды. Президент ауыл шаруашылығы еңбеккерлерін кәсіби мерекемен құттықтап, еліміздің өсіп-өркендеуіне үлес қосқан қажырлы еңбектері үшін ризашылығын білдірді. Ауыл шаруашылығы экономиканың стратегиялық мәні айрықша саласы екенін атап өтті.
Мемлекет басшысының Жарлығымен «Қазақстанның аграрлық саласының еңбек сіңірген қайраткері» атағы Ғабит Мүсірепов атындағы аудандағы «Ақселеу» серіктестігінің басшысы Серік Малаевқа, «Құрмет» ордені «Қазақстан астық консорциумы» кәсіпорнының бас директоры Бахтияр Оспановқа берілді. Бұл марапаттар – солтүстік қазақстандық диқандардың жоғары кәсібилігі мен көпжылдық адал еңбегіне берілген лайықты баға.
Серік Тәттібайұлы Тахтаброд ауылдық округінде орналасқан «Ақселеу» «ЖШС-ға 1987 жылдан бері жетекшілік етіп келеді. Округке қарасты Ковыльный ауылында бүгінде 130 үй, 400-ден астам адам тұрады. Әр үйге су, жылу тартылған. Әлеуметтік, мәдени, спорттық нысандар талапқа сай жарақтандырылған. Ауыл шаруашылығы саласы автоматтандырылған, цифрландыруға ерекше назар аударылды. Жүзден астам тұрғын жұмыспен қамтылған. 15500 гектар алқапқа астық, бұдан бөлек, герофорд асыл тұқымды ірі қара малы және жылқы өсіріледі.
Ал «Қазақстан астық консорциумы» еліміздегі жетекші агрохолдингтердің бірі саналады. Құрамына 30-ға жуық шаруашылық кіреді. Былтыр 43 жаңа комбайн сатып алса, биыл 32 егін егу кешенімен толықты.
Компания солтүстік аймақтар, оның ішінде Қызылжар өңірінің бірқатар аудандарында дәнді, майлы және бұршақты дақылдар өсірумен, егіс алқаптарын әртараптандырумен, озық технологияларды енгізумен айналысады. Әлеуметтік жауапкершілік аясында жыл сайын ауылдар арасындағы жолды қардан тазалау, әлеуметтік нысандарды жөндеу жұмыстарына белсене атсалысады.
Өмір ЕСҚАЛИ,
«Soltüstık Qazaqstan».