Ұлттық статистика бюросы облыстық департаментінің хабарлауынша, қазір өңірдегі халық саны 522,2 мың адам, оның 264 мыңы немесе 50,6 пайызы ауылда тұрады.
Былтырғы қаңтар-желтоқсан ішінде облыста 5112 нәресте дүниеге келген. Олардың ішінде 2627-сі – ұл және 2485-і – қыз. Облыс аудандары арасында бала туу көрсеткіші бойынша Уәлиханов, Ақжар және Жамбыл аудандары алда. Облыс бойынша ең төмен туу көрсеткіші Аққайың ауданында тіркелген. Мамлют және Ғабит Мүсірепов атындағы аудан да көш соңында.
Өткен жылдың қаңтар-желтоқсан аралығында облыста 6088 адам қайтыс болды. Өлім-жітімнің негізгі себептерінің арасында ең үлкен үлес – 20,6 пайызы жүйке жүйесі, 16,5 пайызы – қан айналымы жүйесі, 14,5 пайызы – тыныс алу, 9,3 пайызы – ас қорыту органдарының ауруларына тиесілі. Сонымен қатар 8,9 пайызы – обыр және 6,5 пайызы – жазатайым оқиғалар, улану мен жарақаттану салдарынан өмірден өткен.