2018 жылдың ақпаны туа теріскейдегі қыс қалыпты мінезіне салды. Қатты жел қалың қарды көтеріп, жер мен көк астасып жатыр. Айнала ақ түтек боранның ұйқы-тұйқы көңілімен үндестік тапқанына келіншек қуанбаса, ренжіген жоқ-ты. Балкондағы қатып қалған «қоқыстан» байқатпай құтылуына табиғаттың өзі жағдай жасап тұрғандай… Борандатып жүріп 10 күннің ішінде күйеуінің бөлшектелген денесінің біраз бөлігін үй ауласындағы қоқыс жәшігіне тастап үлгерді. Тек қауқиған дене мен басы қалған-ды…
«Қоқыстан» құтылмақ болып…
Неше күн үзбей соғып, толастамаған ақпанның ақ бораны қанды қылмысты жасыра алмады. Сол жылдың 10 ақпанында облыс орталығындағы көпқабатты үйлердің бірінде орын алған оқиғаның жай-жапсары облыстық қылмыстық істер жөніндегі ауданаралық мамандандырылған сотында «жіпке тізілді». Отбасындағы жанжал салдары жан түршіктірерлік. Отырыста айыптаушы тарап Е.Бунинаның күйеуін асқан қатыгездікпен қалай өлтіргенін баяндап берді. Күдіктінің сөзінше, жеке шаруаларымен сыртқа шыққысы келген оны күйеуі үйден шығарғысы келмеген. Болмашыдан шыққан жанжал құрғақ шырпыдай лап ете тұтанады. Ызаға булық қан Елена күйеуін итеріп жіберген кезде ол диванға шалқалап құлаған. Содан кейінгі қатыгездік, қанышерлікпен жасалған әрекеттер жүректі шайлықтырады. Әбден ашу қысқан Бунина күйеуін соққының астына алады. Көзіне қан құйылған каныпезер әйел үстел үстінде жатқан пышақты ала сала, ес-түссіз жатқан ер адамның денесіне сұғып алады. Содан кейінгісі есінде жоқ. Жүзі жарқыраған пышақтың неше мәрте сұғылғанын сарапшылар да анықтай алмады. Сот-медициналық сараптама нәтижесі көрсеткендей, ер адамның қансырағаны сондай, денесінде қасықтай қан қалмаған…
Жүзі қылпып тұрған пышақты суырып-сұққан сайын айызы қанған әйелдің бір уақытта әлі құриды. Ас үйдегі диванға құлаған қалпы жан тапсырған күйеуіне «Жедел жәрдем» шақырмайды, полицияға хабарласуды да жөн санамайды. Есін жинамаққа сыртқа шығып кетеді. Пәтеріне қайта оралған келіншектің сол сәттегі ойын түсінуге тырысудың өзі қорқынышты. Күйеуінің қансыз-сөлсіз денесін сүйреп апарып пәтердің балконына шығарып тастайды. Бірер күннің ішінде ақпанның аязына қақиып қатып қалған мәйітті бір апта бойы балтамен шауып, мүшелеп, өзі тұрған үйдің ауласындағы қоқыс жәшігіне лақтыра берген.
Сол маңнан өтіп бара жатқандар қоқыс пакетінен шығып жатқан адамның дене мүшелерін көріп, полицейлерге хабар береді. Контейнерлер жанынан ер адамның аяқ-қолдары да табылады. Үйде мәйіттің басы мен денесінің қалғанына қарағанда Бунина жоспарын соңына дейін жүзеге асырып үлгермеген.
Балтамен шапқан
Сот залында Е.Бунина өзін балтамен «ет» шапқан қанышер әйел емес, тиран-күйеудің қорлығын көп көрген, зорлық-зомбылықтың құрбаны ретінде көрсетпек болады. «Бейкүнә кейіп, мүшкіл халге түскен» келіншек бар болғаны түскі астың қамымен дүкенге барғысы келіпті. «Ас үйде балық тазалап тұрдым. Күйеуім төргі бөлмеде болатын. Дүкенге баратынымды естіген бойда жаныма жетіп келіп, жекіре бастады. Қолымды қайырды. Итеріп едім, диванға құлады. Сол кезде басы қабырғаға соғылған болуы керек, тарс еткен дыбыс естідім. Бір уақытта қайтадан атып тұрды да менің алқымымнан алды. Содан кейін шашымнан жұлып, басымды есікке соқты. Ашуландырғаны сонша, үстел үстінде жатқан пышақты алып, ішіне сұққанымды түсінбей қалдым. Ол диванға құлады», – деген келіншек ашу үсінде неше рет пышақ сілтегенін есіне түсіре алмады. Не себепті «Жедел жәрдем» мен полицияны шақырмағанын да түсіндірген жоқ. Көзінің жасын көлдетпеді, күңіренбеді, күрсінбеді де. Ал жансыз денені ет турағандай етіп бөлшектегенін кірпік қақпай әңгімелеген.
«Үш күннен кейін мәйітті бөлшектей бастадым. Шалбарын шешіп алып, қоқысқа тастадым. Ал футболканы шешудің қажеті болмады, бөлшектеуге кедергі келтірмес үшін арқа тұсын ғана қидым. Дене бөліктерін қоқыс жәшігіне апарып отырдым», – деген келіншек сөйте тұра күйеуін өлтіру туралы ойының болмағанын, тек өзін қорғағысы келгенін айтудан танбады.
«Бір күні өлтірем…»
Сот ісіне қатысушылар куәгерлердің жауабынан ерлі-зайыптының тыныс-тіршілігі жайлы біраз мағлұматқа қанық болды. Мәселен, қайтыс болған ер адамның туған апасы ағасымен жақсы араласса да осы уақытқа дейін азаматтық некедегі әйелін бір рет те көрмегенін айтты: «Ағам дау-жанжалды ұнатпайтын сабырлы жан еді. Өзі келіп, жағдайымды біліп кететін. Өзім де жиі хабарласып, жағдайын біліп тұратын едім. Әйелінің ащы суға әуес екенін өзінен естідім. 9 ақпан күні такси арқылы азық-түлік беріп жіберген едім. Таксиші ағамның телефонды көтермегенін айтып, бергенімді қайтадан әкеліп тастады. Бірнеше күннен кейін Бунинаға хабарласқанымда ол екеуінің жанжалдасып қалғанын, ағамның ашуланып далаға шығып кеткенін айтты. Сол уақытта ағамның жансыз денесін балталаумен болған екен ғой».
Күдіктінің ішкен кезде өзін- өзі ұстай алмайтынын басқа куәгерлер де растады. Ұсталатын күннен бір күн бұрын Бунина жақын танысына барады. Күйеуінің Пресновкаға көшіп кеткенін, бұдан былай онымен тұра алмайтынын айтып, мұңын шағады. Сол үйде қонып қалады. Күйеуінің Пресновкада емес, сан бөлшекке бөлініп, жартылай балконда, жартылай қоқыс жәшігінде жатқаны өзіне ғана мәлім…
Сот залында бөтелкелес жолдастары оқиға орын алған күннен бір күн бұрын ерлі-зайыптының пәтерінде отырыс болғанын айтты. Жақында ғана отадан шыққан отағасы дастарқан басына жақындамаған. Ащы суға сылқия тойып алған әйел күйеуіне тиісіп: «Әбден шаршаттың. Бір күні өлтірем…» деген… Дегені болды. Сот Е.Бунинаны 10 жылға бас бостандығанан айыру туралы үкім шығарды.
P.S.
Бүгінгі қоғамда жаныңды түршіктіріп, төбе шашыңды тік тұрғызар қылмыстың түр-түрі орын алып жатыр. Сондай келеңсіз, сұрықсыз оқиғаларды ести-ести оған етіміз өліп, жүрегіміз қатайып алғандай… Ештеңеге селт етпейтіндей болдық. Әйелдер де қанышер атанып, жауыздықпен адам өмірін қиюға барып жатыр. Бұрын болмаған қатыгездік, қанішерлік қайдан келді, бір- бірін пышақтап, буындырып, тұншықтырып, өртеп өлтіретіндер неге көбейіп барады? Жауабын айту қиын.
Жадыра ЕСЕНГЕЛДІ,
«Soltüstık Qazaqstan».