С. Мұқанов атындағы облыстық қазақ сазды-драма театрында Мұхтар Әуезовтің «Қорғансыздың күні» шығармасы сахналанды. Қойылымында баласынан айырылған ананың, күйеуінен айырылған әйелдің, әкесінен айырылған қаршадай қыздың тағдыры бейнеленген.
Туындыда тағдыр тауқыметін тартқан бір отбасының өмірі арқылы сол кезеңдегі күллі қазақтың басына түскен ауыртпашылық сипатталған. Қойылымның басты кейіпкері – 13 жасында асқар тауынан айырылған Ғазиза. Шынашақтай жеткіншек адам төзгісіз қиындықты еңсереді. Алайда қатыгездік, жауыздық жан-жақтан талап, бойжеткен әкесінің моласында жан тапсырады. Осылай қорғансыздардың азапты өмірі өзгелерді тәубешілікке, жақындарды құрметтеуге шақырғандай.
«Тағдыры ауыр қыздың образын сомдау өзіме оңай тимеді. Дайындық барысында Ғазизаны тағдырына мойынсұнбаған, тіпті, оған қарсылық көрсетуге талпынған батыр қыз ретінде таныдым», – деді актриса Балдырған Бақытжанова.
Спектакльдің режиссері Асылхан Разиев басты кейіпкер Ғазизаның рөліне әртіс таңдауда қиналғанын айтты. Өткен ғасырдың басында жарық көрген Мұхаңның бұл әңгімесінің көлемі шағын болғанымен, ауқымы кең, қуаты зор, күні бүгінге дейін оқырманның жүрегін қарып, көкірегін қарс айыратын трагедия.
– 2023 жылы Мәскеудегі «ГИТИС – мастер-класс» атты фестивальге Е.Серкебаев атындағы өнер колледжінің студенттерін апарып, «Қорғансыздың күнін» сахналадық. Сол кезден бастап бұл шығарма ойда жүрді. Қойылымды көрерменге ұсынуға екі айға жуық уақыт кетті, – деді Асылхан Разиев.
Самрат ҚҰСКЕНОВ,
«Soltüstık Qazaqstan».
Суретті түсірген
Шыңғысхан БЕКМҰРАТ.